‘आफ्नो ठाउँ गाउँ आफै चिनाऔं’ भन्ने नाराका साथ अगाडि बढाइएको यस कार्यक्रमको उद्घाटन समाजसेवी तथा व्यवसायी एवं घराना बाईट्सका सञ्चालक हरि सुवेदीले कार्यक्रमको ब्यानर पढेर गरेका थिए। उनले बुढानिलकण्ठको धार्मिक, सांस्कृतिक र प्राकृतिक महत्त्वमाथि प्रकाश पार्दै युवाहरूलाई स्वदेशमै बस्न आग्रह समेत गरेका थिए। बुढानिलकण्ठलाई पर्यटकीय गन्तव्यका रूपमा विकास गर्न स्थानीय समुदाय, सरकार र युवावर्गको सहकार्य अपरिहार्य रहेको उनको भनाइ थियो।
लिङ्कन कलेजका प्रधानाध्यापक प्रकाश शर्मा घिमिरेले आयोजकले युवा वर्गलाई लक्षित गरी कलेजस्तरीय कार्यक्रम राखेर आफ्नो ठाउँलाई प्रवर्द्धन गर्न बुढानिलकण्ठ चिनारी कार्यक्रम आयोजना गरेकोमा खुसी व्यक्त गर्दै यसलाई नौलो र अति आवश्यक कार्यक्रमको संज्ञा दिए।
कार्यक्रममा विशेष अतिथि प्रकाश गुरुङ (समाजसेवी तथा युवा नेता) र सनवे कलेजकी विशिष्ट अतिथि चन्दा थापाले पनि मन्तव्य राख्दै युवाहरूलाई पर्यटन प्रवर्द्धनमा सक्रिय भूमिका खेल्न र स्थानीय सम्पदाको संरक्षणमा लाग्न प्रेरित गर्न यस्ता कार्यक्रमको महत्त्वपूर्ण भूमिका रहेको बताए।
सेमिनारका मुख्य आकर्षणमध्ये एक प्रशिक्षण सत्रमा प्रशिक्षक तथा मोडरेटर कृष्ण सापकोटाले बुढानिलकण्ठको ऐतिहासिक, धार्मिक, सांस्कृतिक र प्राकृतिक पक्षहरूको बारेमा विस्तृत जानकारी दिएका थिए। उनले बुढानिलकण्ठको प्राचीन विष्णु मूर्ति, शान्त वातावरण, र शिवपुरी–नागार्जुन राष्ट्रिय निकुञ्जको निकटताले यसलाई एक महत्त्वपूर्ण पर्यटकीय गन्तव्य बनाउन सक्ने सम्भावनाबारे चर्चा गरे।
कार्यक्रमका सभापति तथा लाइभ नेपाल नेटवर्कका सञ्चालक पुष्कर राज पाण्डेले सेमिनारको औचित्यमाथि प्रकाश पार्दै युवा पुस्तालाई आफ्नो स्थानीय क्षेत्रको महत्त्व बुझाउनु र उनीहरूलाई पर्यटन विकासमा संलग्न गराउनु नै कार्यक्रमको मुख्य उद्देश्य रहेको बताएका थिए। कार्यक्रम सञ्चारकर्मी तथा समाजसेवी सावित्री बस्नेतले कुशल ढङ्गले सञ्चालन गरेकी थिइन्।
यस सेमिनारले युवाहरूमा बुढानिलकण्ठको पर्यटकीय सम्भावनाबारे चेतना वृद्धि गर्न र उनीहरूलाई भविष्यमा पर्यटन विकासका गतिविधिहरूमा सक्रिय रूपमा संलग्न गराउन महत्त्वपूर्ण योगदान पुर्याउने अपेक्षा गरिएको छ। कार्यक्रममा विभिन्न संघसंस्थाका व्यक्तिहरूको उल्लेखनीय उपस्थिति रहेको थियो।
