असार २२, काठमाडौँ । नेकपा एस (एकीकृत समाजवादी) ले केन्द्रीय कमिटीलाई पूर्णता दिन मापदण्ड बनाउने भएको छ । दसौँ राष्ट्रिय महाधिवेशनपछि शनिबार बसेको पहिलो बैठकमा कमिटीलाई पूर्णता दिन मापदण्ड बनाउने निर्णय गरेको हो ।
पहिलो दिनको बैठकमा दसौँ राष्ट्रिय महाधिवेशनको प्रारम्भिक समीक्षा गर्दै महाधिवेशनले सम्पूर्ण नेपालीको ध्यानाकर्षण गराउन सफल भएको निष्कर्ष निकालेको छ । बैठकले महाधिवेशन भव्यताका साथ सफल बनाउन सहयोग गर्ने सबैलाई धन्यवाद ज्ञापन पनि गरेको छ ।
बैठकले अर्को व्यवस्था नहुन्जेलसम्म तत् जिम्मेवारीलाई निरन्तरता दिने अन्तरिम व्यवस्था गरेको प्रचार विभाग प्रमुख जगन्नाथ खतिवडाले बताए । आइतबार बिहान बस्ने बैठकले कमिटीलाई पूर्णता दिन मापदण्ड बनाएर अघि बढ्ने प्रचार विभाग प्रमुख खतिवडाको भनाइ छ ।
शुक्रबार सम्पन्न सो पार्टीको महाधिवेशनले अध्यक्ष, उपाध्यक्ष, सम्मानित नेतासहित ९३ जना केन्द्रीय सदस्य छनोट गरेको थियो । बाँकी १८ पदाधिकारीसहित २०६ केन्द्रीय सदस्य छनोट गर्न बाँकी छ ।
