बबई रिसोर्ट: जहाँ प्रकृति र आतिथ्यको मुस्कान साटासाट हुन्छ

राजेन्द्रमान डङ्गोल

पश्चिमतर्फ बर्दिया राष्ट्रिय निकुञ्जको विशाल साम्राज्य, पूर्वतर्फ मध्यवर्ती क्षेत्रको रहस्यमयी शान्ति र यी दुईको बीचमा ’कलकल’ सङ्गीत भर्दै बग्ने खौरा खोला । कर्णालीको यो पवित्र हाँगाले सिञ्चित गरेको एउटा अनुपम धर्ती— जहाँ सूर्यको पहिलो किरणले जङ्गलका पातहरूलाई बिउँझाउँछ र सूर्यास्तको सुनौलो आभा खोलाको पानीमा पग्लिन्छ । यही प्राकृतिक त्रिवेणीमा उभिएको छ— बबई रिसोर्ट । यो केवल एउटा आवास गृह मात्र होइन, बरु प्रकृतिको लयमा हराउन चाहनेहरूका लागि एउटा सुरक्षित आश्रय र आत्मिक शान्तिको मन्दिर हो ।

‘बबई’— सुन्दा एउटा मधुर शब्द, तर यसको गहिराइ निकै विशाल छ । यो दाङ उपत्यकाको उर्वर भूमि चिर्दै बग्ने नदीको तीव्र वेग हो र तराईको माटोमा कडा सङ्घर्षका साथ फुल्ने काँडेदार वनस्पतिको ओज पनि । यो पानीको अविराम बहाव, यहाँको माटोको अदृश्य शक्ति र नेपाली मुस्कानसहितको न्यानो स्वागतको एउटा अद्भुत सङ्गम हो । यही मौलिक पहिचान र माटोको आत्मालाई आत्मसात् गर्दै उभिएको छ— बबई रिसोर्ट । यो नेपाली आतिथ्यको एउटा सजीव प्रतीक हो, जहाँ प्रकृतिको आदिम सङ्गीत र आधुनिक मानवीय सभ्यताको एउटा सुन्दर राग एकैसाथ गुञ्जायमान हुन्छ ।

पहिलो स्पर्श र वास्तुकलाको जादु

रिसोर्टको मूल गेटबाट भित्र प्रवेश गर्नासाथ फराकिलो पार्किङ क्षेत्रले पाहुनालाई स्वागतको पहिलो सन्देश दिन्छ । गाडीबाट ओर्लनासाथ देखिने व्यवस्थित र कलात्मक स्वागत कक्षले आत्मीयताको स्पर्श गराउँछ । यहाँका हरेक संरचनाहरूमा आधुनिक सुविधा र परम्परागत नेपाली शैलीको एउटा सन्तुलित र कलात्मक सङ्गम देख्न सकिन्छ । नीलो आकाशलाई आफ्नो छातीमा प्रतिविम्बित गर्ने स्विमिङ पुल, विभिन्न थरीका फूल र बिरुवाहरूले सिँगारिएको हरियाली बगैँचा, व्यवस्थित  डाइनिङ हल, कफीको सुगन्ध आउने न्यानो क्याफे र अत्याधुनिक प्रविधियुक्त सभाहलहरूले यस रिसोर्टको भव्यता र व्यावसायिकतालाई दर्शाउँछन् ।

२९ कठ्ठाको विशाल जमिनलाई यसरी व्यवस्थापन गरिएको छ कि पाहुनाले यहाँ कहिल्यै साँघुरोपन महसुस गर्दैनन् । हरेक भवन र बगैँचाको बीचमा पर्याप्त खुल्ला ठाउँ छोडिएको छ । यसले पाहुनालाई एकातिर आफ्नो निजी समयको पूर्ण अनुभव गराउँछ भने अर्कोतिर प्रकृतिको अनन्त खुल्लापनमा स्वच्छ सास फेर्ने अवसर दिलाउँछ । यहाँको बाटो हिँड्दा होस् या बगैँचामा राखिएका कुर्सीमा बस्दा पाहुनाले आफूलाई एउटा स्वतन्त्र चराजस्तै महसुस गर्छन् ।

पामका रुख र ‘ट्रपिकल’ आभा

रिसोर्टको आँगनमा पाइला टेक्नेबित्तिकै आकाश छुन अग्लिँदै उभिएका सुसज्जित पामका रुखहरूले स्वागत गर्छन् । लहरै उभिएका यी सदावहार रुखहरूले रिसोर्टलाई एउटा वैदेशिक ‘ट्रपिकल’ लुक्स मात्र दिएका छैनन्, बरु विलासिता र प्रकृतिको काखमा रहेको गहिरो अनुभूति पनि दिलाउँछन् । जब हावा चल्छ, यी पामका पातहरूले गर्ने सरसर आवाजले मनलाई एकप्रकारको ‘मेडिटेसन’ मा लैजान्छ । यी रुखहरू रिसोर्टको सौन्दर्य मात्र नभई यहाँका जैविक चक्रका साक्षी पनि हुन् ।

तोप चराको प्रेम गाथाः प्रकृतिको जीवन्त पाठशाला

बबई रिसोर्ट केवल इँटा र कङ्क्रिटको संरचना होइन, यो त प्रकृतिको एउटा जीवन्त पाठशाला र प्रेमको सङ्ग्रहालय पनि हो । यहाँको बगैँचामा एउटा यस्तो विशाल र ऐतिहासिक पामको रुख छ, जसले हरेक आगन्तुकको ध्यान तान्छ । त्यो रुख केवल अग्लो मात्र छैन, बरु त्यो त एउटा ‘प्राकृतिक आवास’ हो— जहाँ तोप चरा (बाया वेभर) हरूले आफ्ना विश्वप्रसिद्ध र कलात्मक गुँडहरू सजाएका छन् ।

यी चतुर चराहरूको जीवनचक्र निकै अनौठो र विस्मयकारी छ । प्रत्येक वैशाखको आगमनसँगै जब तराईमा नयाँ पालुवाहरू पलाउन थाल्छन्, यी चराहरू पहाडको शीतल काख छोडेर बबईको यो प्राङ्गणमा झर्छन् । यो उनीहरूको सिर्जना, सङ्घर्ष र प्रेमको ऋतु हो । यहाँको पामका हाँगाहरूमा प्रत्येक भाले चरा एउटा ‘कुशल इन्जिनियर’ झैँ दिनरात एक गरेर गुँड बुन्न तल्लीन हुन्छन् । उनीहरूको यो कडा मिहिनेत केवल बासका लागि मात्र होइन, बरु आफ्नो जीवनसङ्गििनीलाई रिझाउन र एउटा सुरक्षित भविष्यको सुनिश्चितताका लागि पनि हो ।

रिसोर्टको झ्यालबाट देखिने यो दृश्य कुनै सिनेमाको रोमान्टिक कथाभन्दा कम हुँदैन । पोथी चरा एउटा निर्णायकको भूमिकामा रुखका हाँगा–हाँगामा डुल्छ र भालेले बनाएका गुँडहरूको सूक्ष्म निरीक्षण गर्छ । जसको कला उत्कृष्ट छ, जसको बुनाइ बलियो र सुन्दर छ, पोथीले उही भालेलाई आफ्नो जीवनसाथी रोज्छ । यो एउटा यस्तो प्राकृतिक ‘स्वयंवर’ हो, जसले मानिसलाई धैर्य, अथक मिहिनेत र सही छनोटको साँचो अर्थ सिकाउँछ । जब असोज लागेपछि तराईको वायु चिसिन थाल्छ, यी चराहरू पुनः पहाडतिर लाग्छन् । उनीहरूले छोडेर गएका ती रिक्त तर कलात्मक गुँडहरूले बबई रिसोर्टको बगैँचालाई एउटा छुट्टै कथा र दार्शनिक गहिराइ दिइरहन्छन् । साच्चै, प्रकृति र प्रेमको सजीव सङ्गमको नाम नै बबई रिसोर्ट हो ।

मौलिक आवास र सांस्कृतिक बिम्बहरू

रिसोर्टको वरिपरि चिटिक्क परेका एकपाखे सुन्दर भवनहरू रहेका छन्, जसले यहाँको स्थानीय वास्तुकलालाई सम्मान गर्दै आधुनिक रूप दिएका छन् । यी भवनहरूमा जम्मा ६७ वटा सुविधासम्पन्न कोठाहरू छन् । पाहुनाको आवश्यकता र सहजतालाई ध्यानमा राख्दै यहाँ सिङ्गल, डबल र ट्रिपल बेडरूम गरी कुल २०० बेडको क्षमता रहेको छ । यो विशाल क्षमताले गर्दा व्यक्तिगत भ्रमणदेखि लिएर ठूला पारिवारिक जमघट, वैवाहिक उत्सव वा संस्थागत सभा–सम्मेलनहरूका लागि बबई रिसोर्ट एउटा निर्विकल्प र उपयुक्त गन्तव्य बनेको छ ।

बबई रिसोर्टका प्रत्येक भवनमा मौलिक शैलीका फराकिला पिँढी र बार्दलीहरू छन्, जसले नेपाली ग्रामीण जीवनको मधुर झझल्को दिन्छन् । अझ विशेष त, प्रत्येक बार्दलीमा लसुनका मुठाहरू झुन्ड्याइएका देखिन्छन् । यो केवल सजावटको एउटा वस्तु मात्र होइन; यसले बर्दियाको रैथाने थारु संस्कार, उनीहरूको कृषि संस्कृति र परम्परालाई जीवन्त रूपमा इङ्गित गर्दछ । आधुनिक सुविधाको बीचमा यस्ता स–साना ग्रामीण विम्बहरूले पाहुनालाई आफ्नै घरको आँगनमा रहेको जस्तो आत्मीय अनुभूति गराउँछन् । पाहुनाहरूको सुविधा र स्वास्थ्यलाई ध्यानमा राख्दै प्रत्येक तलामा स्वच्छ पिउने पानीको जार व्यवस्थित रूपमा राखिएको छ, जसले रिसोर्टको सेवाप्रतिको गम्भीरता र जिम्मेवारी बोध गराउँछ ।

मिष्टान्न भोजन र स्वादको संसार

बबई रिसोर्ट बस्नका लागि मात्र नभई स्वादको एउटा रङ्गीन संसार पनि हो । रिसोर्टले आफ्ना पाहुनाहरूलाई तृप्त पार्न ‘मिष्टान्न भोजन’ को विशेष प्रबन्ध मिलाउँछ । रिसोर्टको मेनुमा रैथाने नेपाली स्वादका परिकारदेखि लिएर मसलेदार इन्डियन र विशिष्ट कन्टिनेन्टल परिकारहरू समावेश गरिएका हुन्छन् । यहाँको भान्साको मुख्य विशेषता भनेको सामग्रीको ताजापन र विविधता हो । पाहुनाहरूले आफ्नो बसाइका क्रममा दिनैपिच्छे फरक–फरक परिकारहरूको स्वाद लिन पाउँछन् । अनुभवी सेफहरूद्वारा प्रेमपूर्वक तयार पारिने यी परिकारहरूले पाहुनाको जिब्रोलाई मात्र लोभ्याउँदैनन्, बरु स्वास्थ्य र ताजापनको ग्यारेन्टी समेत दिन्छन् । बिहानीको ‘सनराइज ब्रेकफास्ट’ देखि साँझको ‘क्यानडल लाइट डिनर’ सम्म यहाँ एउटा सुखद र स्वादिष्ट यात्राको अनुभव गर्न सकिन्छ ।

सांस्कृतिक झझल्को र थारु कला

बबई रिसोर्ट भौतिक सुविधाको केन्द्र मात्र नभई बर्दियाको जीवन्त संस्कृति बुझ्ने एउटा ऐना पनि हो । रिसोर्टको परिसरभित्रै सांस्कृतिक कार्यक्रम प्रदर्शनका लागि एक फराकिलो र व्यवस्थित खुला मञ्च छ । साँझपख जब जङ्गलबाट शान्त र शीतल हावा चल्न थाल्छ, यहाँको मञ्चमा थारु समुदायको परम्परागत नाचगान र सङ्गीत गुञ्जायमान हुन्छ । थारु जीवनशैली, उनीहरूको भोगाइ र उल्लाससँग जोडिएका लाठी नाच र सखिया नाच  जस्ता मौलिक प्रस्तुतिहरूले पाहुनाहरूलाई मन्त्रमुग्ध बनाउँछन् । आधुनिक सुविधायुक्त बसाइको बीचमा यसरी स्थानीय माटोको सुगन्ध, ढोलकको ताल र मौलिक लय मिसिँदा पाहुनाहरूले आफूलाई बर्दियाको वास्तविक संस्कृतिसँग एकाकार भएको महसुस गर्छन् ।

झ्यालबाटै जङ्गलको स्वागत र खौराको सुसेली

बबई रिसोर्टका कोठाहरू रात बिताउने खोपी मात्र होइनन्, यी त प्रकृतिको विशाल क्यानभास हेर्ने ‘आँखीझ्याल’ हुन् । जब पाहुनाहरूले बिहानीको सुनौलो घामसँगै कोठाका पर्दाहरू खोल्छन्, तब घना जङ्गल र सुगन्धित हरियालीले उनीहरूलाई आत्मीय स्वागत गर्छ । झ्यालबाटै देखिने बर्दिया राष्ट्रिय निकुञ्जको त्यो रहस्यमयी दृश्य, चराचुरुङ्गीको मधुर चिरबिर र जङ्गलको स्वच्छ हावाले मनलाई बेग्लै शान्ति र ऊर्जा प्रदान गर्छ ।

खौरा खोलाको किनारमा बसेर जब शीतल हावाले स्पर्श गर्छ, तब महसुस हुन्छ— त्यो केवल हावा होइन, प्रकृतिको एउटा मिठो सन्देश हो । खोलाको पानीको कलकल आवाजले मनभित्रका सारा तनावहरू पखालिदिन्छ । यहाँको निश्चल र शान्त वातावरणले शहरको कोलाहलबाट थकित मनलाई गहिरो विश्राम दिन्छ र हरेक पाहुनालाई आफू यस धर्तीकै एक विशेष अंश भएको अनुभूति दिलाउँछ । ओछ्यानबाटै खौरा खोलामा पानी खान आएका वन्यजन्तुहरूको चहलपहल देख्न पाउनु यहाँको सबैभन्दा जादुमयी पक्ष हो ।

थारु बस्ती र जङ्गलको रोमाञ्चकता

बबई रिसोर्टको सामीप्यमा मौलिक थारु बस्तीहरू रहेका छन् । रिसोर्टले पाहुनाहरूका लागि ‘भिलेज भिजिट’ को विशेष व्यवस्था मिलाउँछ, जहाँ थारु समुदायका परम्परागत खडाइले बारेका माटोका घरहरू, उनीहरूको सरल तर सुखी जनजीवन र जीवन्त संस्कारलाई नजिकबाट नियाल्ने अवसर प्राप्त हुन्छ । यो केवल एउटा साधारण भ्रमण मात्र होइन, बरु बर्दियाको वास्तविक माटो र मानिसको हृदयसँग जोडिने एउटा भावुक माध्यम पनि हो ।

पर्यटकहरू बर्दिया भ्रमणमा आउनुको मूल ध्येय नै बाघ लगायतका दुर्लभ जङ्गली जनावरहरूको प्रत्यक्ष अवलोकन गर्नु हो । यही चाहनालाई हृदयङ्गम गर्दै बबई रिसोर्टले अत्यन्तै रोमाञ्चक र सुरक्षित जङ्गल सफारीको समन्वय गर्दछ । बर्दिया राष्ट्रिय निकुञ्जमा बाघको सङ्ख्या करिब १२५ पुगेको सुखद अनुमान छ, जसले गर्दा यहाँ पुग्ने प्रायः पर्यटकहरूले ‘वनराज’ बाघको दर्शन नगरी फर्कनु पर्दैन । सफारीका क्रममा बाघका साथै विभिन्न प्रजातिका रङीचुङ्गी, पन्छीहरू, चञ्चल मृग, घोरल, बाह्रसिङ्गा, विशाल जङ्गली हात्ती र एकसिङे गैँडा जस्ता वन्यजन्तुहरूलाई उनीहरूकै प्राकृतिक वासस्थानमा नजिकबाट नियाल्ने सुवर्ण अवसर मिल्दछ । प्रकृतिको यो विशाल र खुल्ला चिडियाखानाभित्रको यात्राले हरेक पाहुनाको मनमा साहस, कौतुहलता र आनन्दको एउटा अमिट छाप छोड्छ ।

एक अविष्मरणीय यात्रा

बबई रिसोर्टमा समय रोकिँदैन, बरु प्रकृति र आनन्दको एउटा अनौठो लयमा समाहित हुन्छ । यहाँको प्रत्येक कोठा आरामको एउटा सुन्दर कथाजस्तै छ, प्रत्येक परिकार स्वादको एउटा भव्य उत्सवजस्तै छ र प्रत्येक साँझ जिन्दगीको एउटा सुनौलो सम्झनाजस्तै बन्छ । शहरको भीडभाड, प्रविधिको तनाव र कामको बोझबाट टाढा गएर प्रकृतिसँग जोडिन चाहनेका लागि बबई रिसोर्ट प्रतीक्षामा छ । यो एउटा गन्तव्य मात्र होइन, यो त आत्मिक शुद्धी र प्रकृतिसँगको सामीप्यका लागि गरिने एउटा आधुनिक तीर्थ हो ।

बबई रिसोर्ट— जहाँ प्रकृति प्रेमको भाषा बोल्छ र नेपाली आतिथ्य सधैँ मुस्कुराउँछ । यहाँ आउनु एउटा यात्रा होइन, आफूले आफैँलाई चिन्ने एउटा जीवन्त अनुभूति हो ।