काठमाडौं । होटल फरेष्ट इनको प्राथमिक शेयर (आईपीओ) बाँडफाँट भएको छ। कम्पनीको शेयर निष्काशन तथा बिक्री प्रबन्धक एआईसी एशिया क्यापिटलले काठमाडौंको बुढानीलकण्ठस्थित होलिडे इन रिसोर्टमा आईपीओ बाँडफाँट गरेको हो ।
होटल फरेष्ट इनले गत माघ २२ गतेदेखि माघ २६ गतेसम्म सर्वसाधारणका लागि प्रतिकित्ता १०० रुपैयाँ अंकित मूल्यका ३३ लाख २० हजार कित्ता आईपीओ निष्काशन गरेको थियो।
सो निष्काशनमा कुल २६ लाख ६० हजार ४५२ आवेदकले २ करोड ९९ लाख ७८ हजार ८६० कित्ता शेयर खरिदका लागि आवेदन दिएका थिए। जसमध्ये २३ लाख ७१ हजार ३१५ आवेदक स्वीकृत भएको छ भने बाँकी आवेदन रद्द भएको बिक्री प्रबन्धकले जानकारी दिएको छ ।
मागभन्दा बढी आवेदन परेका कारण गोलाप्रथा प्रक्रियामार्फत कम्पनीको आइपीओ बाँडफाँट गरिएको छ। जसअनुसार भाग्यमानी ३ लाख ३२ हजार आवेदकले १० कित्ताका दरले शेयर पाएका छन्।
आईपीओको रिजल्ट बिक्री प्रबन्धक र मेरोशेयरको रिजल्ट वेवसाइटबाट आफ्नो डिम्याट खाता राखेर हेर्न सकिनेछ ।
