काठमाडौं । पाथीभरमा केबलकार निर्माणविरुद्ध आन्दोलितहरूले सोमबार राति रुख ढालेर मेची राजमार्ग अवरुद्ध गरेका छन् ।
पाँचथरको गोपेटारमा दर्जनौँ रुख ढालेर सडक अवरुद्ध गरिँदा कारण प्रसूति व्यथाले छट्पटाइरहेकी महिला बोकेको एम्बुलेन्ससमेत बाटैमा रोकिएको छ ।
सातादेखि आन्दोलित केबलकारविरोधी समूहको आन्दोलन उग्र बन्दै जाँदा सडक छेक्न रुख नै ढालिएको हो । मध्यराति रुख ढालेर सडक छेकिँदा आकष्मिक रुपमा बिरामी परेकाहरूलाई समेत लैजान समस्या भएको छ ।
पाँचथरको सडकमा रुख ढालेर सडक अवरोध गरिँदा सोमबार राति २ बजेदेखि बिहानैसम्म एम्बुलेन्स अलपत्र परेको थियो । एम्बुलेन्सभित्र रहेकी सुत्केरी व्यथा लागेकी १८ वर्षीय महिला चिच्याइरहेकी थिइन् । बाटैमा सुत्केरी ब्यथाले च्यापेकी उनलाई एम्बुलेन्सले अस्पताल लैजाँदै थियो ।
सुत्केरी व्यथा लागेर स्थानीय स्वास्थ्य चौकीमा प्रसूति गराउन नसकेपछि हिलिहाङ-२ देखि फिदिम लाँदै गरेकी कल्पना जोगी (तामाङ)को ज्यान नै जोखिममा परेको थियो।
एम्बुलेन्स चालक नुपु शेर्पाले राति २ बजे बिरामी लिएर आउँदै गर्दा बाटोमा रुख ढालिएपछि बिरामी बचाउन गोपेटार फर्काएको बताए ।
अवस्था जटिल भएपछि गोपेटारमा बिहानसम्म पनि प्रसूति गराउन नसकिएको त्यहाँका स्वास्थ्यकर्मी चन्द्र घिमिरेले बताएका छन् ।
प्रहरीले बिहान रुख हटाएर सडक सुचारु गरेको छ । अवरोध हटेसँगै ती महिलालाई प्रसुति गराउन जिल्ला अस्पताल पठाइँदैछ ।
गत माघ १५ गतेदेखि मेची राजमार्ग र तमोर करिडोर बन्द छ । ‘नो केबलकार समूह’ले मंगलबारदेखि अरुणपूर्वका नौ जिल्लामा आमहड्ताल गरेको छ ।
