काठमाडौं– राष्ट्रिय मुक्ति पार्टी नेपालले काठमाडौंमा आन्दोलनरत शिक्षकमाथि सरकारले गरेको दमनको विरोध गरेको छ । अध्यक्ष राजेन्द्र महतोले सोमबार विज्ञप्ति जारी गरेर सरकारले शिक्षकमाथि गरेको दमनको विरोध गरेका हुन् ।
‘शान्तिपूर्ण आन्दोलनमा प्रहरी प्रशासनद्वारा गरिएको अत्याधिक दमन र बल प्रयोगले पाँच दर्जनभन्दा बढी शिक्षक र पत्रकार घाइते बनाउनु लोकतान्त्रिक मुलुकको निम्ति अत्यन्त दुर्भाग्यपूर्ण र दुःखको विषय हो,’ उनले भनेका छन्, ‘यस्तो राज्य आतंक र कुकृत्यको हामी घोर भत्सर्ना गर्दछौँ ।’
सामुदायिक विद्यालयका लाखौँ विद्यार्थीको भविष्य बिग्रिरहँदा सरकार गम्भीर नहुनु, माग पूरा गर्न उदासिन देखिनु र शिक्षकहरूको शान्तिपूर्ण आन्दोलनमाथि प्रहार गर्नुले सरकारको अत्याचार, निरङ्कुशता र दमनकारी चरित्रको उजागर भएको महतोको भनाइ छ ।
‘लोकतान्त्रिक मुलुकमा यसखाले गतिविधिलाई कुनै पनि हालतमा स्वीकार गर्न सकिँदैन,’ विज्ञप्तिमा भनिएको छ, ‘समाजलाई अंधकारबाट मुक्ती दिलाउने शिक्षकहरु एक्लो नरहेको उहाँहरूको जायज मागको साथमा सम्पूर्ण न्यायप्रेमी जनता रहेकोले निरीह र असहाय ठान्ने सरकारले भुल नगरोस् र यथाशीघ्र पीडित शिक्षकहरुको माग तत्काल सम्बोधन गरोस् ।’
अध्यक्ष महतोले २७ दिनदेखि आन्दोलनरत शिक्षकहरूलाई आन्दोलन र आफू आवद्ध पार्टीसँगको आवद्धता मध्ये कुनै एक छोड्न पनि सुझाव दिएका छन् ।
‘अधिकतर शिक्षकहरू अहिलेकै सत्तासीन प्रमुख दलमै आवद्ध हुनुहुन्छ । उहाँहरूकै सरकार छ र पनि हकहितको निम्ति संघर्ष गर्नुपरेको छ । उहाँहरूकै सरकारले माग पनि सम्बोधन गरिरहेको छैन र उल्टै दमनमा उत्रेको छ,’ विज्ञप्तिमा भनिएको छ, ‘त्यसकारण यस्तो परिस्थितिमा या त उहाँहरूले सरकारको विरुद्धमा आन्दोलन गर्न छोड्नु पर्यो या त अधिकांश शिक्षकहरू आफूहरू आवद्ध रहेको कांग्रेस, एमाले पार्टीको आबद्धता त्याग्नु पर्यो ।’
