काठमाडौं । हिमालयन बैंक र स्मार्ट च्वाइस टेक्नोलोजिज (एससीटी)बीच अन्तरबैंक रकम स्थानान्तरण सेवा सञ्चालन तथा सहकार्यसम्बन्धी सम्झौता भएको छ । सम्झौता अनुसार हिमालयन बैंक एससीटीको ‘स्मार्ट पे नेटवर्क’मा आबद्ध भएको हो ।
आबद्धतासँगै हिमालयन बैंकका ग्राहकले ‘स्मार्टपे आईबीएफटी’मार्फत विभिन्न बैंक तथा वित्तीय संस्थामा रहेका खातामा सहज र सुरक्षित रूपमा रकम स्थानान्तरण गर्न सक्नेछन् । एससीटीले विकास तथा सञ्चालन गर्दै आएको ‘स्मार्टपे आईबीएफटी’ सेवाले सहभागी बैंक तथा वित्तीय संस्था, डिजिटल वालेट र रेमिट्यान्स कम्पनीहरूबीच डिजिटल माध्यमबाट रकम स्थानान्तरणलाई सहज बनाउँदै आएको छ ।
यस सेवामार्फत विभिन्न वित्तीय क्षेत्रबीच अन्तरआबद्धता कायम हुने तथा डिजिटल माध्यमबाट हुने रकम स्थानान्तरण थप सहज हुने अपेक्षा गरिएको छ । यसले नेपालको डिजिटल भुक्तानी प्रणालीलाई थप सुदृढ बनाउन र वित्तीय पहुँच विस्तारमा समेत सहयोग पुग्ने जनाइएको छ ।
नेपाल राष्ट्र बैंकबाट भुक्तानी प्रणाली सञ्चालकको अनुमति प्राप्त एससीटी नेपालमा घरेलु कार्ड ‘एससीटी कार्ड’ सुरुवात गर्ने संस्था हो । हाल एससीटीले विभिन्न बैंक तथा वित्तीय संस्था, वालेट, रेमिट्यान्स तथा सहकारी संस्थामार्फत एससीटी युनियनपे कार्ड, भिसा कार्ड, मास्टरकार्ड, नेपालपे कार्ड, एटीएम, पीओएस, इन्टरनेट तथा मोबाइल बैंकिङ र स्मार्ट क्युआर लगायतका डिजिटल भुक्तानी सेवा सञ्चालन गर्दै आएको छ ।
यो सहकार्यसँगै हिमालयन बैंकका ग्राहकले अन्तरबैंक रकम स्थानान्तरणका लागि थप डिजिटल सुविधा प्राप्त गर्ने भएका छन् ।
