असार २८, काठमाडौं । प्रधानमन्त्री पुष्पकमल दाहाल प्रचण्डले विश्वासको मत लिन नसक्दा पदमुक्त भएका छन् । प्रतिनिधि सभामा शुक्रबार राखिएको विश्वासको मतको प्रस्तावका पक्षमा बहुमत नआएपछि उनी पदमुक्त भएका हुन् । बहुमतका लागि १३८ जना सांसदको साथ खोजेका दाहालले जम्मा ६३ सांसदको मत पाए ।
संसदमा २५८ जना सांसद उपस्थित रहे पनि प्रधानमन्त्रीको प्रस्तावका पक्षमा जम्मा ६३ मत परेको थियो । १८ महिने कार्यकालमा ५ औं पटक विश्वासको मत लिएका दाहालको विपक्षमा १९४ मत परेको सभामुख देवराज घिमिरेले बताएका थिए । प्रस्तावमा मत दिन्न भन्नेमा जम्मा १ मत परेको थियो।
सभामुख घिमिरेले प्रधानमन्त्री दाहालले राखेको विश्वास मतको प्रस्ताव अस्वीकृत भएको घोषणा गरेका थिए ।प्रधानमन्त्री दाहालले राखेको विश्वास मतको प्रस्तावका पक्षमा उनको दल नेकपा माओवादी केन्द्र, राष्ट्रिय स्वतन्त्र पार्टी, नेकपा एकीकृत समाजवादी ले मत दिएका छन्।
प्रस्तावको विपक्षमा नेपाली कांग्रेसस, नेकपा एमाले, जनता समाजवादी पार्टी, जनता समाजवादी पार्टी नेपाल, जनमत लगायत दलका सांसद उभिएका थिए । दाहाल २०७९ पुसस १० गते प्रधानमन्त्रीमा नियुक्त भएका थिए ।
त्यसयता गठबन्धन फेरबदल गर्दै प्रधानमन्त्री दाहालले शुक्रबार पांचौं पटक विश्वासको मत प्रस्ताव पेश गरेका थिए । यस अघि विश्वासको मत पाउंदै आएका प्रधानमन्त्री दाहालले यस पटक विश्वासको मत जुटाउन नसक्दा सत्ताबाट बहिर्गमन भएका हुन्।
