काठमाडौं । नविल बैंक सिँजा शाखाद्वारा फुटासिली आधारभूत विद्यालय, धितालिहीमा शुक्रबार वित्तीय साक्षरता तथा सचेतनामूलक कार्यक्रम सम्पन्न गरिएको छ। कार्यक्रममा विद्यालयका सम्पूर्ण शिक्षक–शिक्षिका तथा कक्षा ५, ६ र ७ का करिब ७० जना विद्यार्थीले बैंकिङ शिक्षा लिएका छन् ।
नविल बैंक सिँजा शाखाका प्रबन्धक हरि बहादुर रावतले प्रशिक्षण प्रदान गरेका थिए। उनले बैंकिङ कारोबार, बैंक सेवा–सुविधा, मोबाइल बैंकिङ, आईपिएस लगायतका विषयमा जानकारी दिएका थिए । विद्यार्थीहरूलाई विद्यालयमै आएर बैंकिङ सेवा सम्बन्धी ज्ञान प्रदान गरिएकोमा विद्यार्थी र शिक्षक दुवै खुसी भएका छन् । कक्षा ७ मा अध्ययनरत विद्यार्थी निराजन बुढाले भने, “हामीलाई बैंकिङ सेवाबारे कुनै ज्ञान थिएन ।
तर, बैंकका कर्मचारीले विद्यालयमै आएर बैंकिङ सेवा र प्रक्रियाबारे सिकाउँदा हामी धेरै खुसी भएका छौं ।” उक्त कार्यक्रमले विद्यार्थीहरूलाई बैंकिङ प्रणालीबारे व्यवहारिक ज्ञान प्रदान गर्नुका साथै वित्तीय सचेतना अभिवृद्धि गर्न मद्दत गरेको विद्यालयका शिक्षकहरूले बताएका छन् ।
