काठमाडौं । नेपाली कांग्रेसका महामन्त्री गगनकुमार थापाले पार्टीका नेताहरू सबैलाई मूल कुरा छोडेर महाधिवेशन लागिसकेको भन्दै आपत्ति जनाएका छन् ।
लोकतन्त्र दिवसको सन्दर्भमा बिहीबार काठमाडौंमा आयोजित ‘आजको लोकतन्त्र अवसर र चुनौती’ विषयक संवाद कार्यक्रममा उनले समय अगावै नेताहरूलाई महाधिवेशन लागिसकेको भन्दै आपत्ति जनाएका हुन् ।
‘पार्टीमा गुट होइन, गिरोह बनेको छ । तल्लो तहसम्म बनेको छ । गुट भए आफू हुने, नभए नहुने भइसक्यो,’ महामन्त्री थापाले भने, ‘मूल कुरा छोडेर सबैलाई अहिले नै अधिवेशन लागेको छ । मुखले नभनेका मात्रै हुन् ।’
महामन्त्री थापाले आगामी निर्वाचन हारे पनि, जिते पनि सबै मिलेर कांग्रेसलाई लोकतन्त्र बचाउन भरोसा दिलाउने पार्टी बनाउनुपर्नेमा जोड दिए । ‘छोडिदिनुस् मिसन ०८४ । हारे हारौँला, जिते जितौँला,’ उनले भने, ‘लोकतन्त्र बचाउन भरोसा दिलाउने गरी पार्टी बनाउनु पर्नेछ ।’
महामन्त्री थापाले काठमाडौंमा आन्दोलित सामुदायिक विद्यालयका शिक्षकहरूले अघि सारेका मागमा कांग्रेसको धारणा स्पष्ट भएको पनि बताए । उनले संसद्बाट हुने काम गर्न नसकिएको प्रति शिक्षकहरूसँग माफी पनि मागे ।
‘शिक्षकको कुरा आयो कांग्रेस क्लियर छ । तर, माफी चाहन्छौँ– संसद्बाट हुनुपर्ने कुरा ढिलो भयो । दोषको हिस्सेदार हौँ,’ महामन्त्री थापाले भने, ‘शिक्षकका विषयमा सरकारले लोभ–लालच नराखी मन्त्रिपरिषद्बाट हुने निर्णय जति गर्नुपर्यो ।’
