वैशाख १९, काठमाडौं । तारकेश्वर नगरपालिका वडा नं. ११ को सहकार्य र डिजिटल आईसिटी मिडिया प्रा.लि को संयोजनमा नेपाल राष्ट्रिय माध्यमिक विद्यालय, नेपालटारमा एकदिने लैङ्गिक हिंसासम्बन्धी जनचेतनामूलक कार्यक्रम सफलता पूर्वक सम्पन्न भएको छ ।
कक्षा ८, ९, र १० का १०० भन्दा बढी विद्यार्थीहरूको उत्साहजनक सहभागिता रहेको यस कार्यक्रमको उद्देश्य युवामाझ लैङ्गिक समानता, अधिकार, र हिंसाविरुद्ध सचेतना फैलाउनु रहेको थियो ।
कार्यक्रमका प्रमुख अतिथि वडा नं. ११ की वडा सचिव उमा बस्नेतले लैङ्गिक विषयमा विद्यार्थीहरूलाई सचेत बनाउनु आजको आवश्यकता भएको बताउँदै समाजको तल्लो तहसम्म पुगेर कार्यक्रम गर्नु अत्यन्त सराहनीय कार्य भएको उल्लेख गरिन्। उनले आगामी दिनहरूमा पनि यस्ता कार्यक्रमको निरन्तरताको लागि वडाबाट सक्दो सहयोग रहने प्रतिबद्धता जनाइन् ।
विद्यालयका प्रधानाध्यापक गोविन्द तिल्सिनाले शैक्षिक ज्ञानसँगै सामाजिक शिक्षाको महत्त्व रहेको बताउँदै यस्ता कार्यक्रमले विद्यार्थीहरूको चेतनास्तर वृद्धि गर्न मद्दत गर्ने धारणा राखे। सहायक प्रधानाध्यापक परमेश्वर क्षेष्ठले समानता र सम्मानको भावना युवाहरूमा विकास गराउन यस्ता कार्यक्रम प्रभावकारी हुने बताए ।
कार्यक्रममा अधिवक्ता कृष्ण मरासैनीले लैङ्गिक हिंसाको कानुनी पक्षमा प्रकाश पार्दै शारीरिक मात्र नभई मानसिक र सामाजिक रुपमा पनि हुने हिंसाका बारेमा जानकारी गराए, उनले पीडितहरूको संरक्षणका लागि कानुनले व्यवस्था गरे पनि जनचेतना अझै आवश्यक रहेको स्पष्ट पारे ।
त्यसैगरी, बालाजु प्रहरी वृत्तबाट सहभागी सहायक निरीक्षक विनोद तामाङ र प्रहरी हवल्दार विनु जैसीले व्यवहारिक उदाहरणसहित हिंसाका प्रकार, पहिचानका तरिका, र सुरक्षाका उपायहरूबारे विद्यार्थीहरूसँग अन्तरक्रिया गरे ।
कार्यक्रमका आयोजक पुष्कर राज पाण्डेले डिजिटल युगका विद्यार्थीहरू सामाजिक विषयप्रति पनि सचेत रहनुपर्ने बताउँदै यही सोचका साथ कार्यक्रम आयोजना गरिएको जानकारी गराए ।
कार्यक्रमको उद्घोषणा तथा संक्षिप्त व्याख्या पत्रकार सावीत्री बस्नेतले गर्दै लैङ्गिक हिंसा सहनु होइन, बोल्न सक्नु नै अधिकारको पहिचान हो भन्ने सन्देश दिइन् ।
कार्यक्रममा अन्य विशिष्ट व्यक्तित्वहरूको समेत उपस्थिति रहेको थियो। सहभागी विद्यार्थीहरूले कार्यक्रमलाई अझ विस्तारित रूपमै पुनः सञ्चालन गर्नुपर्ने माग समेत गरेका छन् ।
