ललितपुर, पाटन । कृषि विकास बैंक लिमिटेडले आफ्नो संस्थागत सामाजिक उत्तरदायित्व (CSR) कार्यक्रमलाई निरन्तरता दिँदै श्री पाटन संयुक्त क्याम्पस, पाटन ढोकालाई एक थान अत्याधुनिक डिजिटल स्मार्ट बोर्ड प्रदान गरेको छ। क्याम्पसको व्यवस्थापन संकाय अन्तर्गत सञ्चालित व्यवस्थापन अनुसन्धान विभागको शैक्षिक तथा अनुसन्धानमूलक गतिविधिलाई थप प्रभावकारी र प्रविधिमैत्री बनाउने उद्देश्यले उक्त सहयोग प्रदान गरिएको हो। 
मिति २०८२ साल जेठ ७ गते मंगलबारका दिन क्याम्पस परिसरमा आयोजित एक विशेष समारोहका बीच कृषि विकास बैंक लिमिटेडका उपमहाप्रबन्धक (मार्केटिङ्ग एण्ड सेल्स) श्री सुदिप कुमार दाहालले उक्त डिजिटल स्मार्ट बोर्ड क्याम्पस प्रमुख डा. रघुबिर बिष्टलाई विधिवत रूपमा हस्तान्तरण गर्नुभयो।
हस्तान्तरण कार्यक्रमका प्रमुख अतिथि समेत रहनुभएका उपमहाप्रबन्धक श्री दाहालले आफ्नो मन्तव्यका क्रममा कृषि विकास बैंक लिमिटेडले देशको आर्थिक विकासमा पुर्याएको योगदानको चर्चा गर्दै बैंक नाफामूलक संस्था मात्र नभई समाजप्रति पनि उत्तरदायी रहेको बताउनुभयो। उहाँले बैंकले शिक्षा, स्वास्थ्य, वातावरण संरक्षण लगायत विभिन्न सामाजिक क्षेत्रमा निरन्तर सहयोग गर्दै आएको र पाटन संयुक्त क्याम्पसलाई गरिएको यो सहयोग पनि सोही श्रृङ्खलाको एक हिस्सा भएको स्पष्ट पार्नुभयो। श्री दाहालले यस डिजिटल स्मार्ट बोर्डले विद्यार्थीहरूको सिकाइलाई सहजीकरण गर्ने र अनुसन्धान कार्यमा नवीनता ल्याउने विश्वास व्यक्त गर्नुभयो।
सो अवसरमा क्याम्पस प्रमुख डा. रघुबिर बिष्टले कृषि विकास बैंक लिमिटेडले गरेको अमूल्य सहयोगप्रति हार्दिक आभार तथा धन्यवाद ज्ञापन गर्नुभयो। उहाँले प्राप्त डिजिटल स्मार्ट बोर्डले क्याम्पसको पठनपाठनलाई आधुनिक, प्रविधिमैत्री र गुणस्तरीय बनाउन महत्वपूर्ण भूमिका खेल्ने बताउनुभयो। डा. बिष्टले आगामी दिनमा पनि बैंकबाट यस्तै रचनात्मक र सामाजिक उत्तरदायित्वका कार्यक्रमहरूमा निरन्तर सहयोग प्राप्त भइरहने अपेक्षा राख्नुभयो। उहाँले बैंकको यस किसिमको सहयोगले शैक्षिक संस्थाहरूको क्षमता अभिवृद्धिमा ठूलो टेवा पुग्ने विचार व्यक्त गर्नुभयो।
उक्त गरिमामय कार्यक्रममा कृषि विकास बैंक लिमिटेडका तर्फबाट मार्केटिङ्ग एण्ड सेल्स विभागकी प्रमुख श्रीमती सरिता दहाल, बरिष्ठ शाखा प्रमुख श्री सुरेश थापा र शाखा पुल्चोककी प्रबन्धक श्रीमती प्रतीक्षा नेपालको पनि उपस्थिति रहेको थियो। त्यसैगरी, क्याम्पसका तर्फबाट प्राध्यापकहरु डा. मछिन्द्र थापा, श्री नरेन्द्र सेजुवाल र श्री दिपेन्द्र ढुंगाना लगायत अन्य प्राध्यापक तथा कर्मचारीहरुको पनि उपस्थिति रहेको थियो। कार्यक्रमले बैंक र शैक्षिक संस्थाबीचको सहकार्यलाई थप प्रगाढ बनाएको सहभागीहरूले महसुस गरेका थिए।
