नुवाकोटको भृकुटी माविका पूर्वविद्यार्थीको प्रेरणादायी पहल : विद्यार्थीलाई शैक्षिक सामग्री र न्यानो कपडा वितरण

भदौ २२, नुवाकोट । नुवाकोटको बेलकोटगढी नगरपालिका–१२ स्थित भृकुटी माध्यमिक विद्यालयका पूर्वविद्यार्थीले आफ्नो स्कूलप्रतिको माया र सामाजिक उत्तरदायित्वको सुन्दर उदाहरण प्रस्तुत गर्दै अध्ययनरत सबै विद्यार्थीलाई शैक्षिक सामग्री वितरण गरेका छन् । यो कार्यले विद्यार्थीहरूमा पढाइप्रति उत्साह बढाउनुका साथै समुदायमा सकारात्मक सन्देश प्रवाह गरेको छ ।

गत शुक्रबार विद्यालय परिसरमा आयोजित एक हृदयस्पर्शी कार्यक्रममा पूर्वविद्यार्थीहरू राजाराम अधिकारी र हेमप्रसाद भट्टले विद्यार्थीहरूलाई झोला, कापी, कलमलगायत आवश्यक शैक्षिक सामग्री प्रदान गरे । यो सहयोगको समन्वय अर्का पूर्वविद्यार्थी उद्धव खनालले गरेका थिए, जो लामो समयदेखि विद्यालयका  विद्यार्थीहरूको हितमा विभिन्न सहयोगी कार्यमा सक्रिय छन् ।खनालको संयोजनमा यसअघि पनि विद्यार्थीहरूलाई जाडोमा न्याना कपडा वितरण गरिएको थियो । उनले पूर्वविद्यार्थीहरूको सहकार्यमा यस्ता कार्यलाई निरन्तरता दिँदै विद्यालयको शैक्षिक वातावरणलाई थप सुदृढ बनाउने प्रतिबद्धता जनाएका छन् ।

सहयोगदातामध्ये राजाराम अधिकारी सफल व्यवसायी हुन् भने हेमप्रसाद भट्ट शिक्षा मन्त्रालयमा कार्यरत छन् । उनीहरूको यो सहयोगले विद्यार्थीहरूको पठनपाठनमा सहजता ल्याउनुका साथै उनीहरूमा आत्मविश्वास र प्रेरणा समेत थपेको छ । विद्यालयका प्राधानाध्यापक, शिक्षक र विद्यार्थीहरूले यो सहयोगप्रति हार्दिक कृतज्ञता व्यक्त गरेका छन् । उनीहरूको यस्ता कार्यले शैक्षिक गुणस्तर अभिवृद्धिमा महत्वपूर्ण योगदान पुग्ने र विद्यार्थीहरूको भविष्य उज्ज्वल बनाउन सहयोग पुग्ने विश्वास व्यक्त गरे ।

यो पहलले पूर्वविद्यार्थी र विद्यालयबीचको आत्मीय सम्बन्धलाई झल्काउनुका साथै सामाजिक एकताको सशक्त सन्देश दिएको छ । भृकुटी माविका पूर्वविद्यार्थीको यो कार्य अन्य स्कूल र समुदायका लागि पनि प्रेरणाको स्रोत बनेको छ ।