काठमाडौं । आर्थिक वर्ष २०८२/८३ मा प्रभु बैंकको खुद ब्याज आम्दानी २८.७२ प्रतिशतले बढेर ९ अर्ब २६ करोड रुपैयाँ पुगेको छ । अघिल्लो वर्ष यही अवधिमा यस्तो आम्दानी ७ अर्ब १९ करोड रुपैयाँ थियो ।
यता, सञ्चालन नाफा १४.३३ प्रतिशतले घटेर १ अर्ब ५९ करोड रुपैयाँमा सीमित भएको छ ।
त्यस्तै, समीक्षा अवधिमा बैंकले २४ करोड १२ लाख रुपैयाँ खुद नोक्सानी व्यहोरेको छ । अघिल्लो आर्थिक वर्षको सोही अवधिमा बैंकले ८७ करोड २३ लाख रुपैयाँ खुद नाफा कमाएको थियो ।
समीक्षा अवधिमा बैंकको खुद शुल्क तथा कमिसन आम्दानी २ अर्ब २१ करोड रुपैयाँ पुगेको छ। निक्षेप संकलन ३ खर्ब ४८ अर्ब रुपैयाँ र कर्जा प्रवाह २ खर्ब १४ अर्ब रुपैयाँ रहेको छ ।
बैंकका अनुसार खराब कर्जा उल्लेख्य रूपमा बढेपछि जोखिम व्यवस्थापनका लागि ठूलो परिमाणमा प्रोभिजनिङ गर्नुपरेको र त्यसकै असरले नाफा घाटामा परिणत भएको हो ।
बैंकको खराब कर्जा अनुपात ७.०१ प्रतिशतबाट बढेर १५.५५ प्रतिशत पुगेको छ।
बैंकको वितरणयोग्य मुनाफा ६३ करोड ३१ लाख रुपैयाँ ऋणात्मक रहेको छ । अघिल्लो आर्थिक वर्षमा यो रकम २५ करोड ६५ लाख रुपैयाँ ऋणात्मक नै थियो ।
नाफा ऋणात्मक भएसँगै प्रतिसेयर आम्दानी पनि ३.७१ रुपैयाँबाट घटेर १.०२ रुपैयाँ ऋणात्मक भएको छ ।
