राष्ट्रिय जागरण अभियानमा नेकपा : केन्द्रदेखि स्थानीय तहसम्मका नेता कार्यकर्ता परिचालन

अभियान अन्तर्गत उक्त पार्टीका केन्द्रीय नेताहरूको नेतृत्वको टोली गाउँ, वडा र टोलसम्म पुग्नेछन् । त्यसक्रममा उनीहरुले किसान, श्रमजीवी, मजदुर, युवा, विद्यार्थी, महिला, दलित, आदिवासी जनजाति, मधेसी, थारू, अल्पसङ्ख्यक समुदाय, फरक क्षमता भएका नागरिक, पिछडिएका क्षेत्रका जनता, बुद्धिजीवी, शिक्षक, कर्मचारी, उद्यमी तथा व्यवसायीसँग प्रत्यक्ष संवाद गर्ने संयोजक प्रचण्डले जानकारी दिए । उनका अनुसार अभियानका क्रममा नेता कार्यकर्ताहरूले जनताका समस्या, गुनासा, सुझाव र आलोचना सुन्नेछन् ।

जनतासँगको संवाद र भेटमा उनीहरुले महँगी, बेरोजगारी, कालोबजारी, भ्रष्टाचार, आर्थिक असुरक्षा, सार्वजनिक सेवामा हुने ढिलासुस्ती, सुकुमबासी र श्रमिकका समस्या तथा वैदेशिक रोजगारीसँग सम्बन्धित कठिनाइबारे तथ्य र अनुभव सङ्कलन गर्नेछन् ।

‘हामी अभियानका क्रममा जनताले भोगेका समस्यालाई स्थानीय, प्रदेश र सङ्घीय तहका सम्बन्धित निकायसमक्ष पुर्‍याउने, आवश्यकताअनुसार मागपत्र तथा ज्ञापनपत्र प्रस्तुत गर्ने र समाधानका लागि निरन्तर पहल गर्नेछौँ’, संयोजक प्रचण्डले अभियानबारे जानकारी दिँदै भने, ‘जनताबाट प्राप्त गुनासाको अभिलेख राख्ने तथा समाधानका लागि भएका प्रयासको प्रगतिबारे जनतालाई जानकारी दिने अभ्याससमेत अघि बढाउनेछौँ ।’