रसुवा । रसुवाको स्याप्रुबेँसी तथा गोल्जुङ क्षेत्रका बाढीपीडित परिवारको पीडा झन् गहिरिँदै गएको छ। विनाशकारी बाढीका कारण परिवारका सदस्य सम्पर्कविहीन हुनुका साथै घरबारविहीन बनेका नागरिकहरू अहिले सुरक्षित स्थान र उद्धारको पर्खाइमा छन्।
स्याप्रुबेँसी, गोल्जुङ निवासी छोङ गोम्बो लोपेन (धनबहादुर तामाङ) को परिवारले बाढीका कारण ठूलो क्षति व्यहोर्नुपरेको छ। बाढीपछि उनका सहोदर भाइ निमा गोम्बो तामाङ र भान्जा जितमान घले हालसम्म सम्पर्कविहीन रहेको परिवारले जनाएको छ।
यता, स्याप्रुबेँसीमा आएको बाढीका कारण मृत्युको मुखबाट जोगिएका धनबहादुर तामाङका परिवारसहित २० महिनाका बालक, ४ वर्षीया बालिका तथा दुई महिनाकी सुत्केरी जमुना तामाङसहित १३ जना घरबारविहीन तथा अलपत्र अवस्थामा परेका थिए।
उनीहरू सुरक्षित उद्धारको प्रतीक्षामा रहेका बेला केरुङमा रोकिएका धनबहादुर तामाङले फोनमार्फत रुँदै आफ्नो परिवारको अवस्थाबारे जानकारी गराउँदै उद्धारका लागि हारगुहार गरेका थिए। त्यसपछि विभिन्न व्यक्ति तथा निकायको पहल र प्रयासपछि नेपाल सरकारले अलपत्र १३ जनाको सुरक्षित उद्धार गरेको परिवार तथा आफन्तले बताएका छन्।
अलपत्र अवस्थामा रहेका १३ जनाको उद्धार गरिदिएकोमा परिवारले नेपाल सरकारप्रति हृदयदेखि धन्यवाद तथा आभार व्यक्त गरेको छ। विपद्को समयमा सरकारले गरेको उद्धार कार्यले पीडित परिवारमा केही राहतको अनुभूति भएको उनीहरूको भनाइ छ।
तर, केरुङमा अझै अलपत्र अवस्थामा रहेका धनबहादुर तामाङलगायत अन्य नेपाली नागरिकको अवस्था भने चिन्ताजनक रहेको बताइएको छ। उनीहरूलाई समेत तत्काल सुरक्षित रूपमा उद्धार गरी नेपाल ल्याउन पीडित परिवार तथा आफन्तहरूले नेपाल सरकारसँग जोडदार माग गरेका छन्।
विशेषगरी बाढी तथा पहिरोका कारण घरबारविहीन बनेका, परिवारका सदस्य सम्पर्कविहीन रहेका र विदेशी भूमिमा अलपत्र परेका नेपाली नागरिकलाई तत्काल उद्धार, सुरक्षित पुनर्स्थापना तथा आवश्यक राहतको व्यवस्था गर्न सरकार गम्भीर बन्नुपर्ने स्थानीयको माग छ।
पीडित परिवारले विपद्का कारण आफन्त गुमाउने अवस्थामा पुगेका तथा अझै सम्पर्कविहीन रहेका परिवारको खोजी कार्यलाई तीव्रता दिनसमेत सरकारसँग आग्रह गरेको छ।
“एउटा विपत्तिबाट जोगिए पनि अर्को पीडाले सताइरहेको छ। केरुङमा अलपत्र परेका धनबहादुर तामाङलगायत नेपाली नागरिकलाई पनि सरकारले तत्काल उद्धार गरी सुरक्षित घर फर्काउने वातावरण बनाइदिनुपर्छ,” पीडित परिवारको आग्रह छ।
बाढीबाट प्रभावित नागरिकको उद्धारसँगै उनीहरूको बसोबास, खाद्यान्न, स्वास्थ्य उपचार, बालबालिका तथा सुत्केरी महिलाको विशेष संरक्षण र पुनर्स्थापनाका लागि तत्काल राहत प्याकेज घोषणा गर्न पनि सरकारसँग माग गरिएको छ।
विपद्को यो कठिन घडीमा उद्धारको पर्खाइमा रहेका नागरिकको जीवनरक्षा र पीडित परिवारलाई न्याय तथा राहत दिलाउन राज्यका सम्बन्धित निकायले तत्काल प्रभावकारी कदम चाल्नुपर्ने देखिन्छ।
