काठमाडौं । नुवाकोटको पञ्चकन्या गाउँपालिकाले काठमाडौंमा बसोबास गर्दै आएका ज्येष्ठ नागरिकहरूलाई लक्षित गरी काठमाडौंमै पुगेर सामाजिक सुरक्षा (वृद्ध) भत्ता नवीकरण सेवा प्रदान गरेको छ।
भौगोलिक कठिनाइ, पारिवारिक व्यस्तता तथा पछिल्लो समय बाढीपहिरोका कारण गाउँसम्म आवतजावत गर्न देखिएको समस्यालाई ध्यानमा राख्दै गाउँपालिकाले काठमाडौंको तारकेश्वर नगरपालिकास्थित अनुपम द्वार पार्टी भेन्युमा चार दिने शिविर सञ्चालन गरेको हो। भदौ २३ गतेदेखि सुरु भएको उक्त शिविरमा भदौ २५ गतेसम्म ६ ५० भन्दा बढी ज्येष्ठ नागरिकले सेवा लिइसकेका छन्।
पञ्चकन्या गाउँपालिका वडा नं. २ का वडा अध्यक्ष रामशरण श्रेष्ठको नेतृत्वमा पालिकाका पाँचवटै वडाका वडा सचिवहरूको प्रत्यक्ष सहभागितामा नवीकरण कार्य भइरहेको छ। काठमाडौंमा छोराछोरीसँग बस्दै आएका पालिकावासी ज्येष्ठ नागरिकहरूलाई गाउँसम्म पुग्नुपर्ने सास्ती हटेपछि सेवाग्राहीहरू हर्षित भएका छन्।
शिविरमा सासु मानकुमारी उप्रेतीलाई लिएर आएकी सावित्री बस्नेतले काठमाडौंमै सेवा पाउँदा निकै सहज भएको र गाउँ जानुपर्ने ठूलो बाध्यता हटेको बताइन्।
जनताको सहजता नै स्थानीय सरकारको प्राथमिकता हुनुपर्ने मान्यताका साथ यो पहल गरिएको गाउँपालिकाले जनाएको छ। कार्यक्रम सफल बनाउन स्थान उपलब्ध गराई सहयोग गरेकोमा अनुपम द्वार पार्टी भेन्युका सञ्चालक किरण रिजाल र उनको टिमप्रति गाउँपालिका उपाध्यक्ष विमला पाठक के.सी., वडा अध्यक्षहरू महानन्द ढकाल, रामशरण श्रेष्ठ, रामबाबु पराजुली, कार्यवाहक वडा अध्यक्ष रामकुमार तामाङ, माधव प्रसाद सिटौला लगायत जनप्रतिनिधि तथा वडा सचिवहरूले हार्दिक आभार व्यक्त गरेका छन्।
