काठमाडौं । काठमाडौंमा मौलिक नेवा कला-संस्कृति प्रवर्द्धनका साथै सामाजिक उत्तरदायित्व वहन गर्ने उद्देश्यले आयोजित ‘राज एण्ड द १०८ वाल्स’ कला प्रदर्शनी तथा बिक्री कार्यक्रम उत्साहजनक रूपमा सम्पन्न भएको छ। आईसीटी पत्रकार विकास मञ्च र लाइभ नेपाल नेटवर्क प्रा.लि.को सहकार्यमा आयोजित यस कार्यक्रमले युवा सिर्जनशीलतालाई विपन्न बालबालिकाको शिक्षासँग जोड्ने प्रयास गरेको छ।
“सानो उमेरमा उदाहरणीय र सेवाभावी कार्य” : सुनीता डंगोल
कार्यक्रमकी प्रमुख अतिथि काठमाडौं महानगरपालिकाकी कार्यवाहक प्रमुख सुनीता डंगोलले कार्यक्रमको उद्घाटन गर्दै युवा पुस्ताले देखाएको यो तत्परताको उच्च प्रशंसा गरिन्। “यति सानो उमेरमा यस्तो पवित्र सेवाभाव राखेर कला र शिक्षालाई जोड्ने काम हुनु आफैँमा उदाहरणीय छ,” उनले भनिन्। प्रमुख अतिथि डंगोलले विशेष फोटो अनावरण गरी सिर्जनाकर्ता आयोसालाई हस्तान्तरणसमेत गरेकी थिइन्।
स्वागत तथा वक्ताहरूका विचार
कार्यक्रममा स्वागत मन्तव्य राख्दै काठमाडौं महानगरपालिका विपद् व्यवस्थापनका सल्लाहकार एवं मञ्चका प्रमुख सल्लाहकार गोविन्द भुसालले सम्पूर्ण उपस्थित अतिथिहरूलाई हार्दिक स्वागत गरे। उनले समाज रूपान्तरणका लागि आयोजना गरिने यस्ता सकारात्मक कार्यक्रमहरूमा सबै क्षेत्रका व्यक्तिहरू हातेमालो गर्दै जोडिनुपर्ने आग्रह गरे।
नागरिक लगानी कोषकी निर्देशक शोभा श्रेष्ठले आयोजकको प्रयासलाई ‘अत्यन्तै उत्तम र प्रशंसनीय’ भन्दै युवाहरूको सिर्जनात्मक क्षमतालाई प्रोत्साहन गर्न समाजका हरेक वर्ग अगाडि आउनुपर्ने बताइन्।
वडा नं. २१ का वडा अध्यक्ष चूडामणि बज्राचार्य र समाजसेवी सुवर्ण तुलाधरले नेपाल भाषामै मन्तव्य राख्दै नेवा कला, भाषा र संस्कृतिको संरक्षणमा यस्ता अभियानले ठूलो योगदान पुर्याउने बताए।
‘प्रोजेक्ट जीरो इन्वेस्टमेन्ट’का परियोजनाकार गणेश राईले परम्परागत हिटी र नेवा सभ्यताको संरक्षणमा सबै सचेत हुनुपर्ने बताए भने सञ्चारकर्मी तथा समाजसेवी सावित्री बस्नेत ‘साबु’ले आफ्नो कुशल सञ्चालनमार्फत कला र सामाजिक सेवाको मर्मलाई स्पष्ट पारिन्।
युवालाई स्वदेशमै अवसर र कार्यक्रम समापन : पुष्कर राज पाण्डे
आयोजक संस्थाका अध्यक्ष पुष्कर राज पाण्डेले देशका युवाहरूलाई स्वदेशमै आफ्नो क्षमता प्रदर्शन गर्ने वातावरण सिर्जना गर्नुपर्नेमा जोड दिए। उनले भने, “युवाको सिर्जनामार्फत बालबालिकाको शिक्षामा सहयोग पुग्ने यो अभियानले समाजमा सकारात्मक प्रभाव पार्छ। हामी आगामी दिनमा पनि यस्ता कार्यक्रमलाई निरन्तरता दिनेछौँ।” उनले सम्पूर्ण अतिथि, सहयोगी र सहभागीहरूलाई धन्यवाद दिँदै कार्यक्रम समापन गरे।
अतिथि तथा समाजसेवीहरूको उपस्थिति
कार्यक्रममा काठमाडौं महानगरपालिका वडा नं. १५ की वडा सदस्य तथा कार्यपालिका सदस्य मैयालक्ष्मी महर्जन, वरिष्ठ सञ्चारकर्मी श्रीराम पुडासैनी, नेवाः देय् दबू १५ वडा समितिका अध्यक्ष सजय ध्याको, कृष्ण डायमण्डका सञ्चालक तथा समाजसेवी श्रवण कुमार साह, समाजसेवी तथा व्यवसायी गोपाल आचार्य, समाजसेवी तथा व्यवसायी सुशील राणा, युवा कराते खेलाडी होम बहादुर गुरुङ, पूर्व प्रधानाध्यापक तथा समाजसेवी केशव राज पाण्डे, व्यवसायी तथा समाजसेवी हरि सुबेदी लगायत विभिन्न क्षेत्रका विशिष्ट व्यक्तिहरू, पत्रकार तथा समाजसेवीहरूको बाक्लो उपस्थिति रहेको थियो।
