काठमाडौं । सञ्चार तथा सूचना प्रविधिमन्त्री जगदीश खरेलले विभिन्न क्षेत्रमा नेपालीहरूले विश्वकीर्तिमान कायम गर्ने हिम्मत र साहस विश्वकै लागि अनुपम उदाहरण भएको बताउनुभएको छ।
कमलादीस्थित ‘स्काइवाक टावर’ बाट आजदेखि सुरु भएको ‘१०० घण्टा निरन्तर टेलिभिजन संवाद’ (नन–स्टप म्याराथन टिभी टक शो) को उद्घाटन गर्दै मन्त्री खरेलले यस्तो धारणा राख्नुभएको हो। युवा पत्रकार गौरब पौडेलले गिनिज बुक अफ वर्ल्ड रेकर्ड कायम गर्ने उद्देश्यले यो साहसिक सुरुवात गर्नुभएको हो।
नेपाली क्षमताको विश्वव्यापी पहिचान
कार्यक्रमको उद्घाटनसँगै पहिलो अन्तर्वार्ता दिँदै मन्त्री खरेलले भन्नुभयो, “नेपालीहरूमा जन्मजातै अद्भुत क्षमता छ। हामी असाध्यै सहनशील छौँ। तेञ्जिङ नोर्गे शेर्पा र पासाङल्हामु शेर्पाले सगरमाथा चढेर राखेको रेकर्डदेखि अन्य विधासम्म नेपालीको स्वाभिमान र पहिचान विश्वभर छाएको छ।”
उहाँले पत्रकार पौडेलको लगन र मेहनतको प्रशंसा गर्दै थप्नुभयो, “यसअघि रवि लामिछानेजीले ६२ घण्टाको रेकर्ड राख्नुभएको थियो। त्यसपछि ७३ घण्टाको रेकर्ड कसले तोड्ला भन्ने चासो थियो, आज गौरवजीले १०० घण्टाको हिम्मत गर्नुभएको छ। यो नेपालका लागि गर्वको कुरा हो।”
स्काइवाक टावरबाट ऐतिहासिक प्रयास
प्राइम टेलिभिजनमार्फत प्रसारण भइरहेको यो कार्यक्रम नेपालमै पहिलो पटक १०० घण्टासम्म निरन्तर सञ्चालन गर्ने लक्ष्य राखिएको छ। कार्यक्रमका सञ्चालक गौरब पौडेलले युवाहरूको सोच, क्षमता र सिर्जनशीलतालाई अन्तर्राष्ट्रिय मञ्चमा उजागर गर्दै नेपाललाई विश्वसामु चिनाउन यो जोखिमपूर्ण पाइला चालेको बताउनुभयो।
मुख्य विशेषताहरू:
अवधि: १०० घण्टा निरन्तर संवाद।
स्थान: स्काइवाक टावर, कमलादी।
प्रसारण: प्राइम टेलिभिजन।
उद्देश्य: गिनिज बुक अफ वर्ल्ड रेकर्डमा नाम दर्ता गर्ने।
उद्घाटन कार्यक्रममा पत्रकार ऋषि धमला र अभियन्ता दुर्गा प्रसाईंले समेत उपस्थिति जनाउँदै कार्यक्रमको पूर्ण सफलताको शुभकामना व्यक्त गर्नुभएको थियो। मन्त्री खरेलले पत्रकार पौडेललाई यो चुनौतीपूर्ण कार्य सफलताका साथ सम्पन्न गर्न अग्रिम बधाई समेत दिनुभएको छ।
