साउन १३, काठमाडौं । राष्ट्रिय प्रजातन्त्र पार्टी (राप्रपा)का अध्यक्ष राजेन्द्र लिङदेनले सरकारले सौर्य एयरको विमान दुर्घटनाबारे छानबिन गर्ने समितिमा फ्लाईटका लागि अनुमति दिने व्यक्तिका भिनाजुलाई राखेको आरोप लगाएका छन् ।
आईतबार बसेको संघिय संसदको बैठकमा बोल्दै अध्यक्ष लिङदेनले त्रिभुवन विमानस्थलमा दुर्घटना भएको सौर्य एयरको विमानलाई उड्न अनुमति दिने व्यक्तिका भिनाजुलाई नै सरकारले छानबिन समितिको प्रमुखमा राखेको भन्दै आपत्ति जनाएका हुन् । ‘त्यो सौर्य विमान पोखराका लागि उड्न उपयुक्त थियो कि थिएन भन्ने कुरा जांच गर्ने र अनुमति दिने सुरक्षा प्रमुख, जो चाहि अनुसन्धानको सबैभन्दा पहिलो दायरामा आउछन् उनैका भिनाजुलाई छानबिन आयोगको प्रमुख बनाईएको भन्ने कुरा बाहिर आएको छ । यो कुन प्रकारको छानबिन हो ?’ उनले प्रश्न गरे । अध्यक्ष लिङदेनले हरेक पटक हुने विमान दुर्घटनाको छानबिनको जिम्मा एउटै ब्यक्तिलाई दिईदै आएको भन्दै असन्तुष्टि समेत पोखे ।
सरकारले बुधबार नै विमान दुर्घटनाको छानबिन गर्न रतिशचन्द्रलाल सुमनको नेतृत्वमा ५ सदस्यीय समिति गठन गरेको थियो ।
