काठमाडौं । भोटेकोशी नदीमा आएको विनाशकारी बाढीबाट प्रभावित नागरिकको राहत तथा पुनःस्थापनाका लागि समाजसेवी तथा व्यवसायी रुद्रकुमार जोशीले प्रधानमन्त्री दैवी प्रकोप उद्धार कोषमा १ लाख ११ हजार १११ रुपैयाँ आर्थिक सहयोग गर्नुभएको छ।
ललितपुरको सानेपा निवासी जोशीले विपद्को यस कठिन घडीमा बाढीपहिरो प्रभावित नागरिकको पीडामा साथ दिने उद्देश्यले उक्त रकम सहयोग गर्नुभएको हो। उहाँले सहयोग रकम प्रधानमन्त्री दैवी प्रकोप उद्धार कोषमा जम्मा गर्नुभएको जनाइएको छ। नेपाल सरकारले समेत भोटेकोशी बाढीबाट प्रभावित नागरिकको उद्धार, राहत तथा पुनःस्थापनाका लागि प्रधानमन्त्री दैवी प्रकोप उद्धार कोषमा सहयोग गर्न सार्वजनिक आह्वान गरेको छ।
समाजसेवी जोशीको यो सहयोगले विपद्का बेला आर्थिक सहयोग मात्र नभई मानवीय संवेदना, सामाजिक उत्तरदायित्व र सामूहिक सहकार्यको भावनालाई समेत उजागर गरेको छ। उहाँले ‘देशलाई संकट परेको बेला यथाशक्य सबैले सहयोग गर्नुपर्छ’ भन्ने भावनासहित सहयोग गर्नुभएको बताइएको छ।
व्यवसायसँगै सामाजिक क्षेत्रमा समेत सक्रिय रहँदै आउनुभएका जोशी लाईभ नेपाल नेटवर्क प्रा.लि.का सल्लाहकारसमेत हुनुहुन्छ। उहाँ विभिन्न सामाजिक तथा मानवीय गतिविधिमा सक्रिय रहँदै आउनुभएको छ।
भोटेकोशी बाढीबाट प्रभावित नागरिकको उद्धार, राहत र पुनःस्थापनाका लागि पछिल्लो समय विभिन्न व्यक्ति, संघसंस्था तथा व्यवसायिक क्षेत्रबाट प्रधानमन्त्री दैवी प्रकोप उद्धार कोषमा सहयोग जुट्ने क्रम जारी छ।
