इरान र अमेरिकाबीच तनाव कम गर्ने प्रयासस्वरूप संयुक्त राष्ट्रसंघको महासभामा साइडलाइन उच्चस्तरीय वार्ता भएको छ।
इरानी सरकारी सञ्चारमाध्यमका अनुसार विदेशमन्त्री अब्बास अराघ्चीले अमेरिकी विशेष दूत स्टिभ विटकफसँग भेटवार्ता गरेका छन्।
इरानका अनुसार अमेरिकी पक्षकै आग्रहमा भएको वार्तामा तेहरानले आफ्ना माग र सर्तहरू प्रस्तुत गरेको थियो। विशेषगरी होर्मुज जलडमरूमध्य पुनः खोल्ने विषय छलफलको केन्द्रमा रहेको बताइएको छ।
तेहरानका स्रोतका अनुसार अमेरिकासँग कूटनीतिक संवादका सम्बन्धमा इरानको अडान परिवर्तन भएको छैन। तर, अमेरिकाले इरानका सर्त र आफ्ना प्रतिबद्धता पूरा गरेमा थप कूटनीतिक संवादका लागि ठाउँ हुन सक्ने सुरक्षा स्रोतले जनाएको छ ।
यसैबीच, विटकफले इरानी प्रतिनिधिमण्डलसँग ‘लामो छलफल’ भएको बताएका छन् । उनका अनुसार मध्यस्थकर्ताहरूले दिनभर दुवै पक्षबीच आवतजावत गर्दै वार्ता गराएका थिए।
विटकफले छलफलको चरण सफलतापूर्वक सम्पन्न भएको र यो वार्ता रचनात्मक तथा आशाजनक हुने आफूले अपेक्षा गरेको बताएका छन्। मध्यस्थकर्ताहरूले आगामी दिनमा पनि संवादलाई निरन्तरता दिने उनले जनाएका छन्।
इरानी विदेशमन्त्री अराघ्चीले इरान दीर्घकालीन सुरक्षा र शान्तिका लागि कूटनीतिक प्रयासप्रति प्रतिबद्ध रहेको बताएका छन्। उनले अमेरिकाले आफ्ना प्रतिबद्धता उल्लंघन गर्नु नै जारी कूटनीतिक प्रयासको मुख्य अवरोध रहेको दाबी गरेका छन्।
तर, इरानको इस्लामिक रिभोलुसनरी गार्ड कोर्प्स (आईआरजीसी) ले वार्ताप्रति असहमति जनाउँदै सबै सम्भावित परिस्थितिका लागि तयार रहनुपर्ने बताएको छ।
यसले तेहरानबाट एकातिर कूटनीतिक समाधानको संकेत र अर्कोतिर सम्भावित सैन्य प्रतिक्रियाको चेतावनी, दुवै किसिमका मिश्रित सन्देश आइरहेको देखाएको छ ।
