काठमाडौं । खेलकुदले स्वास्थ्यलाई सबल बनाउनुका साथै अनुशासन, आत्मविश्वास र राष्ट्रप्रतिको गौरव बढाउने भएकाले कराँतेजस्ता खेललाई विद्यालय तहदेखि नै प्रवर्द्धन गर्नुपर्नेमा सरोकारवालाहरूले जोड दिएका छन्।
तारकेश्वर नगरपालिका–३ स्थित जितपुर माध्यमिक विद्यालयको प्राङ्गणमा आयोजित ‘इन्टर स्कुल लेभल केन्वाकाई कराते च्याम्पियनसिप–२०२६’ मा सहभागी वक्ताहरूले खेलकुदलाई केवल प्रतिस्पर्धा र पदक प्राप्त गर्ने माध्यमका रूपमा मात्र नभई देशको पहिचान अन्तर्राष्ट्रियस्तरमा स्थापित गर्ने महत्त्वपूर्ण आधारका रूपमा विकास गर्नुपर्ने बताएका हुन्।
‘Sports is for Health, Sports is for Nations’ अर्थात् ‘खेल स्वास्थ्यका लागि, खेल राष्ट्रका लागि’ भन्ने नाराका साथ सम्पन्न प्रतियोगिताको आयोजना जितपुर डोजो, तारकेश्वर टिम जितपुर तथा लाइभ नेपाल नेटवर्क प्रा.लि.ले गरेका थिए।
प्रतियोगितामा तारकेश्वर नगरपालिका–३ भित्रका कालिका शरण माध्यमिक विद्यालय, जितपुर माध्यमिक विद्यालय र नागार्जुन ठूला गाउँ माध्यमिक विद्यालयका विद्यार्थीहरूले सहभागिता जनाएका थिए। त्यसैगरी बालाजु क्लब टारका खेलाडीहरू पनि प्रतियोगितामा सहभागी भएका थिए। प्रतियोगितामा विभिन्न खेलाडीहरूले पदक तथा ट्रफी जित्न सफल भए।
विद्यालयगत प्रतिस्पर्धामा जितपुर माध्यमिक विद्यालय प्रथम, कालिका शरण माध्यमिक विद्यालय दोस्रो तथा नागार्जुन ठूला गाउँ माध्यमिक विद्यालयका विद्यार्थीहरू तेस्रो स्थानमा रहन सफल भए।
कार्यक्रममा तारकेश्वर नगरपालिका–३ का वडाध्यक्ष परशुराम अर्याल, नागार्जुन ठूला गाउँ माध्यमिक विद्यालयका प्रधानाध्यापक अर्जुन फुँयाल, जितपुर माध्यमिक विद्यालयका प्रधानाध्यापक हरिशरण अर्याल, लाइभ नेपाल नेटवर्क प्रा.लि.का सञ्चालक पुष्कर राज पाण्डे, आईसीटी पत्रकार विकास मञ्चअन्तर्गत जिरो इन्भेस्टमेन्टका परिकल्पनाकार गणेश राई, स्वतन्त्र पत्रकार संघ काठमाडौं जिल्ला अध्यक्ष कृष्णराज तिमिल्सिना तथा केन्वाकाई कराते संघका केन्द्रीय अध्यक्ष विदुर कुँवरलगायत विभिन्न क्षेत्रका व्यक्तित्वहरूको उपस्थिति रहेको थियो।
कार्यक्रममा विभिन्न प्रदेश तथा क्षेत्रबाट आएका व्यक्तित्व, पत्रकार, खेलप्रेमी, प्रशिक्षक, विद्यार्थी तथा अभिभावकहरूको समेत सहभागिता थियो।
खेलले स्वास्थ्य, अनुशासन र आत्मबल बढाउँछ कार्यक्रममा बोल्दै सहभागी वक्ताहरूले खेलकुदले शारीरिक स्वास्थ्यलाई राम्रो बनाउनुका साथै मानसिक रूपमा सबल, अनुशासित र आत्मविश्वासी नागरिक निर्माण गर्न महत्त्वपूर्ण भूमिका खेल्ने धारणा व्यक्त गरेका थिए।
उनीहरूले कराँतेजस्ता खेलको माध्यमबाट नेपाली खेलाडीले अन्तर्राष्ट्रियस्तरमा देशको नाम चिनाउन सक्ने भएकाले विद्यालय, स्थानीय तह, खेलकुद संस्था र सञ्चारमाध्यमबीच सहकार्य आवश्यक रहेको बताए।
वक्ताहरूले विद्यार्थीहरूलाई सानै उमेरदेखि खेलकुदमा सहभागी गराउन सके उनीहरूमा आत्मरक्षा गर्ने क्षमता, धैर्य, अनुशासन, नेतृत्व र सकारात्मक सोचको विकास हुने उल्लेख गरे। यस्ता प्रतियोगिताले विद्यार्थीभित्र लुकेको प्रतिभा पहिचान गर्न र भविष्यमा राष्ट्रिय तथा अन्तर्राष्ट्रिय खेलाडी उत्पादन गर्न सहयोग पुग्ने उनीहरूको धारणा थियो।
विदुर कुँवरको योगदानको चर्चा – केन्वाकाई कराते संघका केन्द्रीय अध्यक्ष विदुर कुँवरको कराँते खेलको विकास र प्रवर्द्धनमा रहेको लामो योगदानको कार्यक्रममा विशेष चर्चा गरिएको थियो। करिब चार दशकदेखि कराँते खेललाई अगाडि बढाउन उहाँले गर्दै आउनुभएको मिहिनेत, त्याग र निरन्तरतालाई नेपाली खेलकुद क्षेत्रका लागि महत्त्वपूर्ण योगदानका रूपमा लिइएको थियो।
कराँते खेलको पहिचान विस्तार गर्न, खेलाडीलाई प्रशिक्षण तथा अवसर उपलब्ध गराउन र नयाँ पुस्तालाई खेलप्रति आकर्षित गर्न अनुभवी प्रशिक्षक तथा खेलकर्मीहरूको भूमिका महत्त्वपूर्ण हुने वक्ताहरूको भनाइ थियो। समाजसेवामा समेत सक्रिय कुँवरको लामो अनुभवले नेपाली कराँतेको विकासमा योगदान पुर्याएको उल्लेख गरिएको थियो।
खेलाडीलाई स्वदेशमै अवसर सिर्जना गर्नुपर्नेमा जोड कार्यक्रमका आयोजक टिममा सक्रिय होम गुरुङको प्रयासको पनि प्रशंसा गरिएको थियो। राष्ट्रियस्तरको खेलाडी तथा कराँते प्रशिक्षकका रूपमा अनुभव हासिल गर्नुभएका गुरुङले नेपाली खेलाडीहरूलाई आफ्नै देशमा अवसर सिर्जना गर्दै खेल क्षेत्रको विकासमा योगदान पुर्याउनुपर्छ भन्ने सोचका साथ काम गरिरहेको विषयलाई महत्त्वका साथ उठाइएको थियो।
खेलाडीको प्रतिभा पहिचान गर्ने, विद्यालय तहमा खेलकुदको वातावरण निर्माण गर्ने र नयाँ पुस्तालाई कराँतेप्रति आकर्षित गर्ने उद्देश्यले यस्ता प्रतियोगिता आयोजना गर्नु सकारात्मक पहल भएको सहभागीहरूको धारणा थियो।
आयोजक टिमले गरेको परिश्रम र व्यवस्थापनको प्रशंसा गर्दै वक्ताहरूले आगामी दिनमा पनि यस्ता कार्यक्रमलाई निरन्तरता दिनुपर्नेमा जोड दिएका थिए।
लाइभ नेपाल नेटवर्कका पुष्करराज पाण्डेले दिए धन्यवाद –
लाइभ नेपाल नेटवर्क प्रा.लि.का सञ्चालक पुष्करराज पाण्डेले प्रतियोगिता सफल बनाउन सहयोग गर्ने विद्यालय, प्रशिक्षक, खेलाडी, अभिभावक तथा उपस्थित सम्पूर्ण व्यक्तित्वप्रति आभार व्यक्त गरेका थिए। उनले खेलकुद स्वास्थ्यका लागि मात्र नभई राष्ट्रको पहिचान निर्माण गर्ने माध्यमसमेत भएको उल्लेख गर्दै खेलप्रेमी र प्रतिभाशाली खेलाडीले खेलकै माध्यमबाट नेपालको नाम अन्तर्राष्ट्रियस्तरमा चिनाउनुपर्ने धारणा राखेका थिए। उनले प्रतियोगिताको आयोजना तथा व्यवस्थापनमा महत्त्वपूर्ण भूमिका निर्वाह गर्ने होम गुरुङलाई विशेष धन्यवाद दिँदै आगामी दिनमा पनि खेलकुद प्रवर्द्धनका कार्यक्रमलाई सहकार्यका साथ अगाडि बढाउनुपर्नेमा जोड दिएका थिए।
पत्रकारिताले खेलकुदलाई प्राथमिकता दिनुपर्ने धारणा
स्वतन्त्र पत्रकार संघ काठमाडौं जिल्ला अध्यक्ष कृष्णराज तिमिल्सिनाले खेलकुद क्षेत्रको विकासका लागि पत्रकारिताले पनि महत्त्वपूर्ण भूमिका निर्वाह गर्नुपर्ने बताएका थिए। उनले आगामी दिनमा सञ्चारमाध्यमले खेलकुदका समाचार, खेलाडीका संघर्ष, उपलब्धि र सम्भावनालाई प्राथमिकताका साथ स्थान दिनुपर्ने धारणा राखेका थिए।
उनले विद्यालय तहमा कराँते प्रतियोगिता आयोजना गरेर विद्यार्थीलाई अवसर प्रदान गरेकोमा आयोजक टिम तथा विशेषगरी होम गुरुङप्रति धन्यवाद व्यक्त गरेका थिए। खेलकुदसम्बन्धी सकारात्मक समाचारले नयाँ पुस्तालाई प्रेरित गर्ने र प्रतिभाशाली खेलाडीलाई पहिचान दिलाउन सहयोग गर्ने उनको भनाइ थियो।
विद्यालयका प्रधानाध्यापकहरूले गरे सहकार्यको प्रतिबद्धता
नागार्जुन ठूला गाउँ माध्यमिक विद्यालयका प्रधानाध्यापक अर्जुन फुँयाल र जितपुर माध्यमिक विद्यालयका प्रधानाध्यापक हरिशरण अर्यालले विद्यालयस्तरमा खेलकुद प्रतियोगिता आयोजना गरिएकोमा आयोजक टिमलाई धन्यवाद दिएका थिए।
उनीहरूले विद्यार्थीको सर्वाङ्गीण विकासका लागि पढाइसँगै खेलकुद पनि उत्तिकै आवश्यक रहेको उल्लेख गर्दै यस्ता प्रतियोगिताले विद्यार्थीको क्षमता, आत्मविश्वास र अनुशासन विकास गर्न सहयोग पुर्याउने बताए। आगामी दिनमा पनि आयोजक तथा सम्बन्धित संस्थासँग सहकार्य गर्दै खेलकुद गतिविधिलाई निरन्तरता दिने र कराँते खेलको विकासमा योगदान पुर्याउने प्रतिबद्धता व्यक्त गरेका थिए।
कार्यक्रमको सञ्चालन पत्रकार, समाजसेवी तथा लाइभ नेपाल नेटवर्ककी निर्देशक सावित्री बस्नेत ‘सबु’ले कुशलतापूर्वक गरेकी थिइन्। पत्रकारिता, सामाजिक सेवा तथा विभिन्न सार्वजनिक कार्यक्रमको सञ्चालनमा सक्रिय बस्नेतले कार्यक्रमलाई व्यवस्थित रूपमा अगाडि बढाएकी थिइन्।
विद्यार्थीहरूको उल्लेखनीय सहभागिता, खेलाडीहरूको उत्साह र विभिन्न क्षेत्रका व्यक्तित्वहरूको उपस्थितिमा प्रतियोगिता सफलतापूर्वक सम्पन्न भएको थियो। आयोजक तथा सहभागीहरूले आगामी दिनमा पनि यस्ता प्रतियोगितामार्फत विद्यालयस्तरमा कराँते खेलको विकास, प्रतिभाको पहिचान र नेपाली खेलाडीलाई राष्ट्रिय तथा अन्तर्राष्ट्रियस्तरमा स्थापित गर्न सहकार्य गर्ने अपेक्षा व्यक्त गरेका छन्।
