काठमाडौं– प्रमुख प्रतिपक्षी नेकपा माओवादी केन्द्रले ६ महिने अभियान सञ्चालन गरेर महाधिवेशनको तयारी गर्ने भएको छ । तीन दिनसम्म चलेको केन्द्रीय कमिटी बैठकले अब पहिलो ६ महिना अभियानमा जाने र त्यसपछि अर्को ६ महिनाको तयारी गरेर महाधिवेशनमा जाने निर्णय गरेको हो ।
बैठकको समापनका क्रममा अध्यक्ष पुष्पकमल दाहाल प्रचण्डले ६ महिना अभियान सञ्चालन गरेर अर्को ६ महिनापछि महाधिवेशन गरिने बताएका छन् । ६ महिना अभियानमा गएर आगामी असारमा केन्द्रीय समिति बैठक आयोजना गर्ने र अहिलेको केन्द्रीय समितिलाई महाधिवेशन आयोजक समितिमा बदलेर महाधिवेशनको तयारीमा जाने उनले घोषण गरे ।
अभियानबाट व्यापक रूपमा जनताको सुझाव आउने भएकाले ६ महिने अभियान पनि अन्ततः महाधिवेशनकै तयारी हुने अध्यक्ष प्रचण्डको तर्क थियो । माओवादी बैठकले माघ महिनाभरि अभियानको तयारी गर्ने, फागुन १ गते ‘जनयुद्ध दिवस’ मनाएर ‘हुलाकी र पूर्वपश्चिम राजमार्गमा जनतासँग माओवादी’ अभियान सञ्चालन गर्ने निर्णय गरेको छ ।
माओवादीले चैत महिनाभरि तयारी गरेर वैशाख महिनामा हिमाली र मध्यपहाडी क्षेत्रलाई मध्यनजर गर्दै ‘मध्य पहाडी लोकमार्गमा जनतासँग माओवादी’ अभियान सञ्चालन गर्ने निर्णय गरेको प्रचण्डको सचिवालयले जनाएको छ ।
बैठकले सबै नेताहरूले जिम्मेवारी पाउने गरी कार्ययोजना प्रस्ताव पारित गरेको छ । सबै नेता पालिका र वडासम्म पुग्ने गरी केन्द्रीय कार्यालयले नेताहरुको एक हप्ताभित्र कार्य विभाजनलाई अन्तिम रूप दिने र माघको पहिलो सातासम्म सर्कुलर गरिने अध्यक्ष प्रचण्डले बताएका छन् ।
बैठकले विचार मिल्ने पार्टीसित एकताको तयारी गर्न उच्चस्तरीय पार्टी एकता संवाद समिति गठन गरेको छ । समितिले चाडै एकता वार्ताको पहल गर्ने अध्यक्ष प्रचण्डले जानकारी दिए ।
बैठकले अध्यक्ष प्रचण्डले प्रस्तुत गरेको ‘पार्टी रुपान्तरण र पुनर्गठनको संकल्प, आजको ऐतिहासिक आवश्यकता’ शीर्षकको राजनीतिक प्रस्ताव परिमार्जनसहित पारित गरेको छ । प्रस्तावमा पदाधिकारी र सदस्य गरी ११८ जनाले सुझाव दिएको प्रचण्डको सचिवालयले जनाएको छ ।
