अध्यादेशबारे देश र जनताको हितमा निर्णय लिन्छौं : जसपा

काठमाडौं । जनता समाजवादी पार्टी (जसपा) नेपालका अध्यक्ष उपेन्द्र यादवले अध्यादेशबारे सुझाव कार्यदलले दिएको प्रतिवेदनमा अध्ययन जारी रहेकाे बताएका छन् ।

जसपा नेपालले अध्यादेशबारे अध्ययन गर्न गठन गरेको कार्यदलले अध्यक्ष यादवलाई यसअघि नै प्रतिवेदन बुझाएको थियो । अध्यक्ष यादवका नीजि सचिव महेश चौरसियाले बिहीबार साँझ एक विज्ञप्ती जारी गर्दै उक्त प्रतिवेदनमाथि अध्ययन जारी रहेको बताएका हुन् ।

साथै अध्यादेशको सम्बन्धमा जसपा नेपाललाई जोडेर विभिन्न संचारमाध्यम र सामाजिक सञ्जालहरुमा आएका गलत समाचारको पछि नलाग्न समेत विज्ञप्तीमार्फत आग्रह गरिएको छ ।

‘अध्यादेशको सम्बन्धमा जसपा नेपाललाई जोडेर विभिन्न संचारमाध्यम र सामाजिक सञ्जालहरुमा अतिरञ्जित, मनगढन्ते र प्रायोजित ढंगले आइरहेका समाचार र सूचनाहरु आधारहीन, तथ्यहीन र भ्रामक रहेकोले त्यस्ता गलत र गैरजिम्मेबार सूचना र समाचारको पछि नलाग्न हुन आमजनता, पार्टीपंक्ति र संचारमाध्यमलाई हार्दिक अनुरोध गर्दछौं’ विज्ञप्तीमा उल्लेख छ ।