काठमाडौं । प्रधानमन्त्री केपी शर्मा ओलीले विरोधीहरूले सरकार जान्छ जान्छ भनेर नचाहिँदो हल्ला गरेको बताएका छन् ।
लोकतन्त्र दिवसको अवसरमा बिहीबार भृकुटीमण्डपमा नेकपा एमालले आयोजना गरेको ‘युथ सेलिब्रेशन’ कार्यक्रमलाई छोटो सम्बोधनका क्रममा उनले यस्तो बताएका हुन् ।
‘अहिले विरोधीहरू सरकार जान्छ जान्छ जान्छ भन्न थालेका छन् । लोकतन्त्रमा हामीलाई सरकार स्थिर चाहिन्छ । त्यहीअनुसार हामी मिलेर व्यवस्थालाई बलियो बनाउन लागिरहेका छौँ’, उनले भने, ‘चिन्ता सरकारको गर्ने, हामी होइन चुनाव हेर्ने हो । हामीले मिसन ०८४ भनिरहेका छौँ । अब तपाईंहरू सबैजना मिसन ०८४ मा लाग्नुस् ।’
उनले आफूहरूले अहिलेको संसद्को बनावट अनुसार सकेसम्म सरकारमा रहेर देशलाई अघि बढाउन खोजेको बताए । ‘सरकार चलाउने जे गर्ने हामी गरिरहेका छौँ । संसद्को बनावट अनुसार ठीक ढंगले देश अघि लैजाने कुरामा ध्यान दिएका छौँ’, उनले भने, ‘एमालेलाई निर्णायक राष्ट्रिय शक्ति बनाउन अब तपाईंहरू लाग्नुस् । एमालेलाई कमजोर बनाउन अनेक प्रयास भइरहेका छन्, जनमत फुटाउने प्रयास भइरहेका छन् । त्यसविरुद्ध सबै जुट्नुस् ।’
अर्को प्रसंगमा ओलीले जनताको बलिदाको अपमान गर्दै पूर्वराजा ज्ञानेन्द्र शाहले मजाक उडाउन खोजेको भन्दै आपत्ति जनाएका छन् ।
लोकतन्त्र दिवसको अवसरमा नेकपा एमालेले बिहीबार आयोजना गरेको ‘युथ सेलिब्रेशन’ समारोह सम्बोधन गर्दै उनले राजावादीका पछिल्ला गतिविधिप्रति आपत्ति जनाएका हुन् ।
‘देशमा लोकतन्त्र नमान्ने, संविधान नमान्ने, जनताको बलिदानको अपमान गर्ने, संघर्षको अपमान गर्ने, सफलतालाई अस्वीकार गर्ने र त्यसलाई मजाक उडाउने काम भएको छ,’ प्रधानमन्त्री ओलीले भने ।
ओलीले देखिने, सुनिने र बुझिने गरी युवाले लोकतन्त्र र संविधानको रक्षा गर्दै देशलाई सुशासन र समृद्धिको बाटोमा अगाडि बढाउने काम गर्नुपर्नेमा जोड दिए ।
‘अब युवाहरूले यस्ता कुराहरुलाई देखिने गरी, सुनिने गरी, बुझिने गरी अस्वीकार गर्न आँट गर्नुपर्दछ, उनले भने, ‘र, यस्ता कुराहरुलाई अस्वीकार गर्दै लोकतन्त्रको रक्षा गर्ने, संविधानको रक्षा गर्ने र देशलाई सुशासन र समृद्धिको बाटोमा अगाडि बढाउने काम गर्नुपर्दछ ।’
प्रधानमन्त्री ओलीले विगतमा राजतन्त्रमा रहेको राजाको जेठो छोरा राजा हुने प्रचलनलाई पाखण्डी सिद्धान्तको संज्ञासमेत दिए ।
