काठमाडौं । गत वैशाख १९ गते राष्ट्रपति रामचन्द्र पौडेलले संघीय संसद्का दुवै सदनमा प्रस्तुत गरेको आगामी आर्थिक वर्षको नीति तथा कार्यक्रममाथि सोमबारदेखि छलफल सुरू भएको छ ।
संसद् भवन नयाँबानेश्वरमा बसेको प्रतिनिधिसभाको बैठकको सुरूमा सांसदहरूले शून्य र विशेष समयमा विविध विषयमा आफ्ना भनाइ राखे ।
खासगरी नेकपा एमाले र नेकपा माओवादी केन्द्रका सांसदहरूबीच भ्रष्टाचार र सुशासनका विषयमा जुहारी नै चल्यो ।
राष्ट्रपतिले प्रस्तुत गरेको नीति तथा कार्यक्रमलाई छलफलका लागि टेबुल गर्न प्रधानमन्त्री केपी शर्मा ओली पनि सोमबार संसद् बैठकमा सहभागी भए ।
ओली बैठकमा जाने क्रममा संसद् भवन परिसरमा उनलाई एमालेका प्रमुख सचेतक महेश बर्तौलाले स्वागत गरे ।
ओली गाडीबाट ओर्लिएर संसद् बैठक बस्ने भवनको मूलगेटतर्फ अघि बढ्दै गर्दा त्यहीँ बुम र क्यामेरासहित तैनाथ थिए केही पत्रकार ।
ओली गाडीबाट मुस्कुराउँदै झरेको अवस्थमा पत्रकारको एउटा प्रश्नले रिसाउने अवस्थामा पुगे । एकजना पत्रकार बुम तेर्स्याउँदै ओली बिच्किने गरी भाजपा विदेश विभाग प्रमुखको भ्रमण र प्रमुख प्रतिपक्षी दल नेकपा माओवादी केन्द्रसँगको सम्बन्धबारे प्रश्न गरिदिए ।
संसद् भवनको बैठक कक्षतिर छिर्ने बाटोमै बसेका पत्रकारहरूको प्रश्नले ओली चिँढिए । उनले आफूलाई प्रश्न गर्ने पत्रकारलाई बाटो नै छेकेर बस्न पनि भने ।
संवाद
पत्रकार- प्रधानमन्त्रीज्यू नमस्कार !
प्रधानमन्त्री- नमस्कार है ।
पत्रकार- भाजपा नेता (विजय चौथाइवाले) को भ्रमणपछि माओवादीसँगको सम्बन्ध अलिक मिलेको हो ?
प्रधानमन्त्री – यतापट्टी छिर्नुस् न (रिसाएको मुद्रामा बैठक कक्ष छिर्ने बाटोतिर देखाउँदै), तरिका हुन्छ नि तपाईंहरूको ।
पत्रकारहरूले माओवादीसँगको सम्बन्ध सुध्रिएको हो भनेर प्रश्न गर्दा चिढिएका ओली र प्रचण्डबीच अरु बेलाको भन्दा सौहार्दता देखियो ।
खासमा पत्रकारहरूको प्रश्नलाई पुष्टि गर्ने गरी नीति तथा कार्यक्रमलाई छलफलका लागि टेबुल गर्न ड्यासमा जाने क्रममा ओलीले प्रचण्डसँग भलाकुसारी गरे ।
प्रचण्डसँग मुस्कुराउँदै भलाकुसारी गरेका ओलीले हातसमेत मिलाए । दुईजनाबीचको यो भलाकुसारीको तस्बिर ओलीकै सचिवालयले पत्रकारहरूसम्म पुर्याएको छ ।
यसअघि पनि प्रचण्डसँग निकटता बढ्दा ओलीको सचिवालयले यसैगरी तस्बिरहरू सार्वजनिक गर्ने गरेको थियो ।
टीआरसीको बहानामा अलग्गै वार्ता
ओलीले आइतबार मात्रै प्रमुख प्रतिपक्षी दलका नेता दाहालसँग सङ्क्रमणकालीन न्यायमा केन्द्रित रहेर अलग्गै छलफल गरेका थिए । टीआरसीबारे यसअघि नेपाली कांग्रेसका सभापति शेरबहादुर देउवासहितका नेता अनिवार्य सहभागी हुन्थे । तर
त्यही टीआरसीको नाममा ओलीले पहिलो पटक दाहालसँग सिंहदरबारभित्रै अलग्गै वार्ता गरे। त्यस छलफलमा प्रमुख सत्तारूढ नेपाली कांग्रेसका कोही पनि नेता सहभागी थिएनन् ।
