कृष्णभीरको पहिरोले काठमाडौंमा ग्यास अभाव, बिक्री केन्द्रमा फेरि लाइन

सडक अवरुद्ध हुँदा काठमाडौं उपत्यकातर्फ आउने ग्यास तथा पेट्रोलियम पदार्थ बोकेका सवारीसाधनबीच बाटोमै रोकिएका छन् । जसका कारण उपत्यकामा ग्यास आपूर्ति प्रभावित भएको छ ।

सडक अवरुद्ध भएपछि काठमाडौंका विभिन्न बिक्री केन्द्रमा ग्यास लिन सर्वसाधारणको भीड बढ्न थालेको छ ।

रसुवा बाढीपछि पृथ्वी राजमार्गका विभिन्न स्थानमा सडक कटान, पहिरो तथा लेदो थुप्रिँदा आवागमन प्रभावित हुँदै आएको छ । कृष्णभीरमा गएको पहिरोका कारण राजमार्ग नै पूर्ण रूपमा बन्द भएपछि यसको प्रत्यक्ष असर काठमाडौं उपत्यकाको आपूर्ति प्रणालीमा पर्न थालेको हो ।

विशेषगरी खाना पकाउने ग्यास, पेट्रोलियम पदार्थलगायत दैनिक उपभोग्य तथा अत्यावश्यक सामग्री बोकेका सवारीसाधन उपत्यका प्रवेश गर्न नसक्दा आगामी दिनमा आपूर्ति थप प्रभावित हुनसक्ने देखिएको छ । सडक खुलाउन सम्बन्धित निकायले पहिरो पन्छाउने तथा सडक सञ्चालनमा ल्याउने प्रयास गरिरहेका छन् ।