नेपालको धर्मनिरपेक्षताबारे भारतीय नेता जोलीको सुझाव- जनताको मत बुझ्दा राम्रो

काठमाडौं । भारतीय जनता पार्टीका नेता डा. विजय जोलीले नेपालको धर्मनिरपेक्षताबारे जनताको मतलाई बुझ्दै जानुपर्ने बताएका छन् ।

नेपाल भ्रमणमा रहेका नेता जोलीले बुधबार काठमाडौंमा आयोजित पत्रकार सम्मेलनमा बोल्ने क्रममा उनले धर्मनिरपेक्षताबारे जनताको मत बुझ्दा राम्रो हुने सुझाएका हुन् ।

यद्यपि उनले नेपालीभित्रका सबै बिषयको निर्णय लिने अधिकार नेपाली जनता र यहाँका राजनीतिक दलहरूलाई रहेको पनि बताएका छन् ।

जोलीले दक्षिण एसियाली क्षेत्रीय सहयोग संगठन (सार्क) को सार्थकता समाप्त भइसकेको पनि बताएका छन् ।

यसअघि प्रभावकारी मञ्चका रुपमा रहेको सार्कको सार्थकता अब समाप्त भइसकेको उनले बताए । सार्क निष्प्रभावकारी हुनुमा पाकिस्तान दोषी रहेको उनले बताएका छन् ।

जोलीले नेपाल–भारतबीचको सम्बन्ध अटुट रहेको भन्दै यसलाई निरन्तर अघि बढाइने धारणा राखे ।

नेपाल र भारतबीच रोटी र बेटीको सम्बन्धबाहेक सौनिक क्षेत्रमा पनि गहिरो सम्बन्ध रहेको उनले बताए । नेपालमा रहेको बहुदलीय लोकतन्त्रात्मक प्रणालीको पक्षमा भारत सदैव रहने पनि उनले बताए ।