सन् २०२४ मा शंकास्पद कारोबारमा ४९ प्रतिशत वृद्धि, राष्ट्र बैंकको एफआईयू रिपोर्ट सार्वजनिक

काठमाडाैं, ७ जेष्ठ । नेपाल राष्ट्र बैंकअन्तर्गतको Financial Intelligence Unit (FIU) ले सार्वजनिक गरेको नयाँ प्रतिवेदनअनुसार सन् २०२४ मा शंकास्पद कारोबार (Suspicious Transaction Reports – STRs) मा ४९ प्रतिशतले तीव्र वृद्धि भएको छ।

मंगलबार सार्वजनिक गरिएको वार्षिक न्यूजलेटरअनुसार सन् २०२४ मा ९,३०४ वटा शंकास्पद कारोबारको रिपोर्ट दाखिला भएको छ। यो संख्या सन् २०२३ मा दाखिला भएका ६,२५५ रिपोर्टभन्दा ४९ प्रतिशतले बढी हो। यी तथ्यांकहरू जनवरीदेखि डिसेम्बरसम्मको अवधिमा संकलन गरिएको हो।

एफआईयूका अनुसार यी रिपोर्टहरू संपत्ति (मुद्रा) शुद्धिकरण निवारण ऐन, २०६४ बमोजिम विभिन्न रिपोर्टिङ संस्थाहरूबाट पेश गरिएका हुन्।

१,०८६ शंकास्पद मुद्दा अनुसन्धानका लागि सिफारिस

कुल STRs मध्येकै १,८९४ वटा रिपोर्टहरूको गहिरो विश्लेषण गरिएको छ।
तीमध्ये १,०८६ वटा रिपोर्टहरू कानुनी निकाय र नियामक संस्थाहरूलाई अनुसन्धान तथा सम्भावित कारवाहीको लागि अग्रसारित गरिएको हो। बाँकी ८०८ रिपोर्टहरू अभिलेखीकरण (archive) गरिएको छ, जसलाई आवश्यकता अनुसार नयाँ सूचना प्राप्त भएमा पुनः विश्लेषण गर्न सकिने बताइएको छ।

थ्रेसहोल्ड कारोबार रिपोर्ट पनि बढ्दै

प्रतिवेदनमा उल्लेख भएअनुसार, नियत सीमा (Threshold) पार गरेका कारोबारको संख्या पनि उल्लेख्य रूपमा बढेको छ।
सन् २०२३ मा १७,८३,१८३ वटा थ्रेसहोल्ड कारोबार रिपोर्ट गरिएको थियो भने
सन् २०२४ मा यो संख्या बढेर १९,७२,८५५ पुगेको छ।

शुद्धिकरणको प्रयास तीव्र, निगरानी बढाउँदै एफआईयू

एफआईयूको रिपोर्टले देशमा बढ्दो शंकास्पद वित्तीय गतिविधिहरू प्रति गम्भीर संकेत दिएको छ।
अहिलेको मौद्रिक तथा कानुनी संरचना भित्र रही मुद्रा शुद्धिकरणविरुद्धको निगरानी र अनुसन्धान कार्य तीव्र पारिएको प्रतिवेदनमा उल्लेख छ।