काठमाडाैं । उपप्रधानमन्त्री तथा अर्थमन्त्री विष्णुप्रसाद पौडेलले मलेसियाली लगानीकर्ताहरूलाई नेपालको भौतिक पूर्वाधार र पर्यटन क्षेत्रमा थप लगानी गर्न आग्रह गरेका छन्।
बुधबार नेपालको औपचारिक भ्रमणमा आएको मलेसिया-नेपाल बिजनेस काउन्सिलको प्रतिनिधिमण्डलसँगको भेटवार्तामा उपप्रधानमन्त्री पौडेलले नेपालको पूर्वाधार विकास र पर्यटन क्षेत्रमा अपार सम्भावना रहेको बताउँदै लगानीका लागि अनुरोध गरेका छन्।
“नेपालमा निजी क्षेत्रले लगानी गर्नका लागि उपयुक्त वातावरण छ। नेपालका नीतिहरू लगानीमैत्री छन्। सरकार लगानीकर्ताहरूलाई सहयोग र सहजीकरण गर्न तयार छ,” अर्थमन्त्री पौडेलले भने।
भेटका क्रममा मलेसियाली प्रतिनिधिमण्डलका सदस्यहरूले सूचना प्रविधि, व्यापार, जलविद्युत, पूर्वाधार, वातावरण र पर्यटन लगायत विभिन्न क्षेत्रमा लगानी गर्ने रुचि देखाएका थिए।
सो अवसरमा मलेसिया-नेपाल बिजनेस काउन्सिलका अध्यक्ष प्रदीप कुमार काक्रेजा, गणेश कुमार बङ्गा, एमके सङ्ग्राम लगायतका पदाधिकारीहरूको उपस्थिति रहेको थियो।
