काठमाडौं । नेपाल वायुसेवा निगमले प्रदेश सरकारहरूसँग मिलेर जहाज खरिद तयारी गरेको छ । प्रदेशस्तरीय उडानको लागि निगमले प्रदेश सरकारहरूको सँगको साझेदारीमा जहाज खरिद गर्ने तयारी गरेको हो ।
निगमको व्यवस्थापन र प्रदेश सरकारको लगानीमा प्रत्येक प्रदेश स्तरमा १/१ वटा एसटीओल जहाज खरिद गरेर सञ्चालन गर्ने गृहकार्य भइरहेको निगमले जनाएको छ ।
संस्कृति, पर्यटन तथा नागरिक उड्डयनमन्त्री बद्रीप्रसाद पाण्डेले दिएको विशेष निर्देशन बमोजिम निगमले प्रदेश स्तरमा एसटीओल जहाज सञ्चालन गर्ने विषयमा अहिले सबै प्रदेशसँग छलफललाई अगाडि बढाएको छ ।
एसटीओल जहाज सञ्चालन गर्नको लागि प्रदेश सरकार र स्थानीय सरकारको अनुदान लगानी हुने, स्वामित्व र सञ्चालक वायु सेवा निगम रहने गरी निगमले लगानीको मोडालिटी तयार पारेर छलफल गरेको जनाएको छ । जसमा एउटा जहाज खरिद गर्न ७.४ मिलियन अमेरिकी डलरसम्म पर्न सक्ने अनुमान गरिएको छ ।
साथै, त्यसरी सञ्चालन गर्ने विमानमा प्रदेशको पहिचान हुनेगरी संकेत वा चित्र कोर्न सकिने प्रस्ताव पनि निगमको छ ।
निगमका प्रवक्ता सुवास डाँगीले अहिलेसम्म गण्डकी प्रदेश र कोशी प्रदेशसँग प्रदेशस्तरीय जहाज सञ्चालन गर्ने निगमको प्रस्तावमा छलफल भएको बताए ।
‘खासगरी साना ट्वीनअटर जहाजहरू त्यसरी सञ्चालन गर्न सकिन्छ, जसलाई उडान गर्ने ठाउँ, तालिका र भाडादर समेत प्रदेश सरकारले तोक्न सक्नेगरी छलफल भएको छ’, उनले भने ।
छलफल भएको प्रदेशसँग सकारात्मक वातावरण बनेको र बाँकी पाँच वटा प्रदेशमा पनि छलफल अगाडि बढाउने तालिका रहेको प्रवक्ता डाँगीले बताए ।
