काठमाडौं । बन्दीपुर केवलकार एण्ड टुरिजम लिमिटेडले सर्वसाधारणका लागि निष्काशन गरेको साधारण शेयर (आईपीओ)मा आवेदन दिने आइतबार अन्तिम दिन हो । भदौ ११ गतेदेखि खुल्ला गरेको आईपीओमा माग भन्दा बढी आवेदन परिसकेको छ ।
कम्पनीले आयोजना प्रभावित क्षेत्रका स्थानीय बासिन्दा तथा वैदेशिक रोजगारीमा रहेका नेपालीका लागि बाँडफाँड गरेपछि दोस्रो चरणमा सर्वसाधारणका लागि आईपीओ निष्काशन गरेको हो ।
कम्पनीले जारी पूँजी २ अर्ब ८३ करोड रुपैयाँको २०.७०६७ प्रतिशत अर्थात् ५८ करोड ६० लाख रुपैयाँ बराबरको ५८ लाख ६० हजार कित्ता शेयर निष्काशन गर्ने छ ।
५ लाख ६६ हजार कित्ता आयोजना प्रभावितका लागि र ५ लाख २९ हजार ४०० कित्ता विदेशमा भएकाका लागि बाँडफाड गरेको छ । १ लाख ५८ हजार ८२० कित्ता शेयर कर्मचारीलाई र २ लाख ६४ हजार ७०० कित्ता शेयर सामूहिक लगानी कोषका लागि छ ।
बाँकी ४३ करोड ४१ लाख ८ हजार रुपैयाँबराबरको ४३ लाख ४१ हजार ८० कित्ता शेयर भने सर्वसाधारणका लागि छुट्याएको छ ।
आईपीओमा प्रतिकित्ता १०० रुपैयाँका दरले न्यूनतम १० कित्ता र अधिकतम २० हजार कित्तामा आवेदन दिन पाइने छ ।
आयोजनाको जम्मा अनुमानित लागत ३ अर्ब ८५ करोड रुपैयाँ छ । आयोजनाको लगानी फिर्ता हुने अवधि ८.२२ वर्ष रहेको छ भने डिस्काउण्टमा लगानी फिर्ता हुने अवधि १०.०५ वर्ष छ ।
कम्पनीको शेयर निष्काशन तथा बिक्री प्रबन्धक नेपाल एसबीआई मर्चेण्ट बैंकिङ्ग लिमिटेड छ ।
