काठमाडौं । टोखा नगरपालिकाले भूमि प्रशासनसम्बन्धी कार्यक्षेत्र परिवर्तन गर्न सरकारको ध्यानाकर्षण गराएको छ । नगर कार्यपालिकाको कार्यालयले जारी गरेको प्रेस विज्ञप्तिअनुसार सेवाग्राहीलाई सहज सेवा उपलब्ध गराउने उद्देश्यले यस्तो पहल गरिएको हो । आज नगर प्रमुख, उपप्रमुख, प्रमुख प्रशासकीय अधिकृत, वडा अध्यक्षहरु, वडा सदस्यहरु तथा नगर प्रवक्तासहितको टोलीले भूमि व्यवस्था, सहकारी तथा गरिबी निवारण प्रतिभा रावल र काठमाडौं क्षेत्र नं. ६ का प्रतिनिधिसभा सदस्य एवं परराष्ट्र मन्त्री शिशिर खनालसँग भेटघाट गरेको थियो ।
भेटका क्रममा टोखा नगरपालिकाअन्तर्गत पर्ने साविक गाउँ विकास समितिहरूका नागरिकले हाल भूमि प्रशासन सेवा लिन डिल्लीबजारस्थित मालपोत तथा नापी कार्यालय धाउनुपर्ने बाध्यता रहेको विषय उठान गरिएको थियो । यसले सेवाग्राहीलाई समय र खर्च दुवै दृष्टिले असहज भएको नगरपालिकाको भनाइ छ ।
नगरपालिकाले उक्त समस्या समाधानका लागि टोखा सरस्वती क्षेत्रमा नै मालपोत तथा नापी कार्यालयबाट सेवा उपलब्ध गराउने व्यवस्था मिलाउन आवश्यक पहल गरिदिन सम्बन्धित निकायसँग अनुरोध गरेको छ ।
सो अवसरमा मन्त्री रावल तथा सांसद खनालले उक्त विषयप्रति सकारात्मक धारणा व्यक्त गर्दै आवश्यक पहल गर्ने प्रतिबद्धता जनाएका छन् । प्रेस विज्ञप्तिमा स्थानीय तहभित्रै सेवा उपलब्ध गराउन सके सेवाग्राहीलाई सहजता हुने र सेवा प्रवाह थप प्रभावकारी बन्ने विश्वास व्यक्त गरिएको छ ।
