काठमाडौं । चिनियाँ अटो निर्माता डोङफेङ मोटर निगमले दक्षिण अफ्रिकाको बजारमा आफ्नो नयाँ इलेक्ट्रिक एसयूभी ‘नामी 06 E1’ सार्वजनिक गरेको छ । केही अन्तर्राष्ट्रिय बजारमा ‘भिगो’ नामले परिचित यो मोडल दक्षिण अफ्रिकामा हालसम्मकै सबैभन्दा सस्तो पूर्ण इलेक्ट्रिक एसयूभीका रूपमा प्रवेश गरेको कम्पनीले बताएको हो ।
कम्पनीले सार्वजनिक गरेको नयाँ ईभी एसयूभीको सुरुवाती मूल्य ४ लाख ९९ हजार दक्षिण अफ्रिकी र्यान्ड रहेको छ । यो मूल्य हाल बजारमा उपलब्ध Geely EX5 भन्दा करिब २ लाख र्यान्ड कम रहेको बताइएको छ ।
नामी 06 E1 मा १२० किलोवाट क्षमताको फ्रन्ट–माउन्टेड इलेक्ट्रिक मोटर जडान गरिएको छ, जसले २३० न्युटन मिटर टर्क उत्पादन गर्छ । गाडीले ० देखि १०० किलोमिटर प्रतिघण्टाको गति करिब ७.८ सेकेन्डमा लिन सक्ने कम्पनीको दाबी छ । यसमा ४४.९४ किलोवाट आवर क्षमताको लिथियम–आइरन–फस्फेट ब्याट्री दिइएको छ । चिनियाँ CLTC मापदण्डअनुसार यसले एकपटकको चार्जमा ४०१ किलोमिटरसम्म रेन्ज दिने बताइएको छ भने WLTP मापदण्डअनुसार करिब ३०० किलोमिटर रेन्ज उपलब्ध हुनेछ । ६० किलोवाट डीसी फास्ट चार्जिङ सपोर्ट रहेको यो एसयूभी ३० प्रतिशतदेखि ८० प्रतिशतसम्म चार्ज हुन करिब ३० मिनेट लाग्ने कम्पनीले जनाएको छ ।
उच्च स्पेसिफिकेसन भएको E3 भेरियन्टमा ५१.८७ किलोवाट आवरको ठूलो ब्याट्री दिइएको छ, जसले ४७१ किलोमिटरसम्मको CLTC रेन्ज प्रदान गर्छ । फिचरका हिसाबले गाडीमा १२.८ इन्च इन्फोटेन्मेन्ट डिस्प्ले, डिजिटल इन्स्ट्रुमेन्ट क्लस्टर, वायरलेस फोन चार्जर, ६ वटा एयरब्याग, पार्किङ सेन्सर, इलेक्ट्रोनिक स्टेबिलिटी कन्ट्रोल, ट्र्याक्सन कन्ट्रोल तथा ५०० लिटर बुट स्पेस उपलब्ध छ ।
