काठमाडौं । नेपाल धितोपत्र बोर्डको नयाँ अध्यक्ष नियुक्तिको प्रक्रिया अन्तिम चरणमा पुगेको छ । अर्थ मन्त्रालयअन्तर्गत धितोपत्र सम्बन्धी ऐन, २०६३ को दफा ७ को उपदफा (३) बमोजिम गठित नेपाल धितोपत्र बोर्डको अध्यक्ष छनौट समितिले ४७ जना आवेदकमध्येबाट ४ जनालाई सर्टलिस्टिङ गरेको छ ।
समितिले २०८३ वैशाख १५ गते इच्छुक व्यक्तिहरूसँग व्यक्तिगत विवरण माग गरेको थियो । तोकिएको म्यादभित्र जम्मा ४७ जनाले विवरण पेश गरेकामा ती सबैको मूल्याङ्कन गरेपछि समितिले डा. नवराज अधिकारी, विनयदेव आचार्य, मुकुन्द कुमार क्षेत्री र डा. गोपाल प्रसाद भट्टलाई सङ्क्षिप्त सूचीमा राखेको हो । सर्टलिस्टमा परेका ४ मध्ये दुइ राष्ट्र बैंकका पूर्व कार्यकारी निर्देशक हुन् भने दुइ धितोपत्र बोर्डका पूर्व कार्यकारी निर्देशक हुन् । मुकुन्द कुमार क्षेत्री र डा.गोपाल प्रसाद भट्ट राष्ट्र बैंक पृष्ठभूमिका उम्मेदवार हुन् ।
सङ्क्षिप्त सूचीमा परेका यी चारै उम्मेदवारसँग २०८३ वैशाख ८ गते शुक्रबार अर्थ मन्त्रालयमा छलफलका लागि बोलाइएको छ । डा.नवराज अधिकारीसँग दिनको १ बजे, विनयदेव आचार्यसँग १ः३० मिनेटमा, मुकुन्द कुमार क्षेत्रीसँग २ बजे र डा. गोपाल प्रसाद भट्टसँग २ः३० मिनेटमा छलफल हुने समितिले जनाएको छ ।
