काठमाडौँ । नेपाल कम्युनिस्ट पार्टीका संस्थापक महासचिव पुष्पलाल श्रेष्ठको १०२औँ जन्मजयन्तीको अवसर पारेर पूर्वप्रधानमन्त्री एवं नेकपाका वरिष्ठ नेता कमरेड झलनाथ खनालद्वारा लिखित नयाँ पुस्तक ‘वैज्ञानिक समाजवाद कि बहुदलीय जनवाद’ सार्वजनिक भएको छ।
फाउन्डेसन फर पिस डेभलपमेन्ट एण्ड सोसलिजमको आयोजनामा सोमबार राजधानीको नेपाल प्रज्ञा–प्रतिष्ठानमा आयोजित एक भव्य समारोहका बीच उक्त पुस्तकको विमोचन गरिएको हो। कार्यक्रममा विभिन्न कम्युनिस्ट धारका शीर्ष नेता, बुद्धिजीवी, राजनीतिक कार्यकर्ता तथा समाजवादप्रति चासो राख्ने सर्वसाधारणको उल्लेखनीय सहभागिता रहेको थियो।
पुस्तक विमोचनसँगै कार्यक्रममा नेपालमा समाजवाद निर्माणको मार्ग, बहुदलीय जनवादको सैद्धान्तिक बहस तथा कम्युनिस्ट आन्दोलनको भावी दिशाबारे गम्भीर र सार्थक विमर्श भएको थियो। कार्यक्रमका सहभागीहरूले वर्तमान राजनीतिक परिस्थितिमा यो पुस्तकले वैचारिक बहसलाई नयाँ उचाइ दिने विश्वास व्यक्त गरे।
कार्यक्रममा प्रमुख वक्ताका रूपमा बोल्दै नेताहरू भीम रावल, युवराज ज्ञवाली, शान्ता मानवी, जनार्दन शर्मा, धर्मेन्द्र बास्तोला, सन्देश सी र महेश्वर दाहाललगायतले आ–आफ्नो धारणा राख्नुभएको थियो।
वक्ताहरूले वर्तमान नेपाली राजनीतिको पृष्ठभूमिमा कम्युनिस्ट आन्दोलनको पुनर्गठन, वैचारिक स्पष्टता र समाजवादी रूपान्तरणको अपरिहार्य आवश्यकतामाथि विशेष जोड दिए। उनीहरूले पुँजीवादी व्यवस्थाको विकल्प खोज्दै वास्तविक समाजवादी दिशामा अघि बढ्न सबै कम्युनिस्ट शक्तिहरूबीच वैचारिक एकता र बहस हुनुपर्ने धारणा व्यक्त गरे।
विमोचित पुस्तक ‘वैज्ञानिक समाजवाद कि बहुदलीय जनवाद’ ले नेपाली कम्युनिस्ट आन्दोलनमा लामो समयदेखि चल्दै आएको सैद्धान्तिक बहसलाई वैज्ञानिक ढंगले केलाउने प्रयास गरेको कार्यक्रमका सहजकर्ता तथा सहभागीहरूले बताएका छन्।
