काठमाडौँ, ७ असार । काठमाडौँ महानगरपालिका वडा नं. २८ को कार्यालय र डिजिटल आइसिटी मिडिया प्रा. लि. को संयुक्त सहकार्यमा सञ्चालित २१ दिने “करदाता सचेतना, डिजिटल भुक्तानी तथा व्यावहारिक अभ्यास कार्यक्रम” आज एक विशेष समारोहका बीच सफलतापूर्वक सम्पन्न भएको छ। गत जेठ १७ गतेदेखि सुरु भएको यस सघन प्रशिक्षणको आज २०८३ असार ७ गते समापन गरिएको हो। 
समापन कार्यक्रम वडा अध्यक्ष भाइराम खड्गी प्रकाशको प्रमुख आतिथ्यता तथा डिजिटल आइसिटी मिडियाका कार्यवाहक अध्यक्ष कृष्णराज तिमिल्सिनाको सभापतित्वमा सम्पन्न भएको थियो। कार्यक्रममा वडा सचिव कृष्णप्रसाद सोती, सन्धि एडुकेसन (Sandhi Education) का सञ्चालक धिरजप्रसाद शर्मा लगायत विभिन्न सङ्घसंस्थाका प्रतिनिधिहरूको उपस्थिति रहेको थियो।
२१ दिनसम्म चलेको यस बृहत् अभियानमा प्रशिक्षकहरू बासुदेव गजुरेल, गोविन्द भुसाल, पुष्करराज पाण्डे र साबु बस्नेतले घरबहाल कर, व्यवसाय कर, सम्पत्ति कर, मालपोत कर तथा काठमाडौँ महानगरको अनलाइन राजस्व पोर्टल प्रयोग गर्ने व्यावहारिक विधिको बारेमा प्रशिक्षण दिनुभएको थियो। कार्यक्रममा १२ दिनको इन-हाउस कक्षा, ३ दिनको बागबजार तथा पुरानो बसपार्क क्षेत्रमा फिल्ड भिजिट, २ दिनको करदाता सङ्कलन र ३ दिनको हेल्पडेस्क स्थापना लगायतका स्थलगत गतिविधिहरू सञ्चालन गरिएका थिए।
तालिममा वडा नं. २८ भित्र व्यवसाय गरिरहेका, नयाँ व्यवसाय गर्न लागेका व्यवसायीहरू, लोकसेवा तयारी गरिरहेका युवाहरू, गृहणी तथा विद्यार्थीहरू सहित ८० जनाको सक्रिय सहभागिता रहेको थियो। समापनका अवसरमा सम्पूर्ण सहभागीहरूलाई प्रमाणपत्र वितरण गरिएको थियो।
तालिममा सहभागी व्यवसायी तथा स्थानीयहरूले आफूहरू अत्यन्तै खुसी र सन्तुष्ट भएको प्रतिक्रिया दिएका छन्। सहभागी गृहणी तथा विद्यार्थीहरूले अब कर तिर्नकै लागि वडा कार्यालय धाइराख्नु नपर्ने र आफ्नै मोबाइल वा कम्प्युटरबाट कनेक्ट आईपीएस तथा डिजिटल वालेट प्रयोग गरी सहजै कर बुझाउन सक्ने क्षमता विकास भएको बताए।
कार्यक्रमको समापन गर्दै प्रमुख अतिथि वडा अध्यक्ष खड्गीले डिजिटल प्रविधिको प्रयोगले वडाको राजस्व सङ्कलन पारदर्शी र प्रभावकारी हुने भन्दै सिकेको ज्ञानलाई व्यवहारमा उतार्न सहभागीहरूलाई आग्रह गर्नुभयो। आयोजक संस्थाका तर्फबाट कार्यवाहक अध्यक्ष तिमिल्सिनाले कार्यक्रमलाई सफल बनाउन सहयोग गर्ने वडा कार्यालय, प्रशिक्षक र सम्पूर्ण सहभागीहरूलाई धन्यवाद ज्ञापन गर्नुभयो।
