विराटनगर । सरकारले जिटुजीमार्फत् खरिद गरेको रासायनीक मल विराटनगर आउन शुरु भएको छ ।
कोशी प्रदेशका १३ वटा जिल्ला र मधेस प्रदेशको सिरहा र सुनसरीका लागि मगाइएको ८ हजार ५ सय मेट्रिक टन डिएपी मल आउन शुरु भएको विराटनगर स्थित कृषि सामग्री कम्पनी लिमिटेड प्रादेशिक कार्यालयले जनाएको छ ।
अहिले सम्म ५ सय मेट्रिक टन भन्दा बढी डिएपी मल आइसकेको र यसलाई सम्बन्धित जिल्लाहरूमा पठाउने प्रक्रिया समेत शुरु भइसकेको कामु प्रादेशिक प्रबन्धक कमल पोखरेलले बताए ।
उनले ८ हजार ५ सय मेट्रिक टन युरिया पनि आउन थालिसकेको र आइतबारदेखि सम्बन्धित जिल्लामा पठाइने जानकारी दिए ।
रासायनीक मलको अभाव हुन नदिन यस अघि नै कृषि सामग्री कम्पनी लिमिटेड प्रादेशिक कार्यालय विराटनगरले बफर स्टकमा रहेको डिएपी, युरिया मल वितरण गर्न थालेको थियो ।
अब जिटुजी र ग्लोबल टेण्डर मार्फत खरिद गरिएको रासायनिक मल समेत आउने भएकाले आउने दिनमा रासायनिक मलको अभाव नहुने बताइएको छ ।
