नयाँ दिल्ली- विश्वका नेताहरूमध्ये सामाजिक सञ्जालमा धेरै फ्यान फलोइङ भएकामा पर्छ भारतीय प्रधानमन्त्री नरेन्द्र मोदी । तर पछिल्लो समय उनलाई आन्तरिक र बाह्य संकटले घेरिरहेको छ।
देशभित्र अभिजित दीप्केले ख्याल ख्यालमा बनाएको ककरोज जनता पार्टीले संकट बढाउँदै लगेको छ। सरकार यात्राको १२ वर्षमा पहिलो पटक मोदीका सहयात्रीले सरकारबाट आन्दोलनको बलमा पद छाड्नुपरेको छ।
मोदीका विश्वासपात्रमध्ये एक धिरेन्द्र प्रधानले ककरोजको करिब ३५ दिन लामो प्रदर्शनपछि प्रश्न पत्र चुहिएको केशमा राजीनामा दिनुपरेको छ। उता भारतीय प्रधानन्यायाधीशले हेपेर बोलेपछि खोलिएको ककरोजको इन्स्टाग्राम एकाउन्टमा फलो गर्नेको संख्या ३ करोडनजिक पुगिसकेको छ।
तर यता मोदीलाई भने सामाजिक सञ्जाल कम्पनी मेटाले पनि हेपेको छ। मेटाले प्रधानमन्त्री नरेन्द्र मोदीको फेसबुकबाट हटाइएको भिडियो बल्लतल्ल फिर्ता पठाइदिएको छ। कम्पनीले मंगलबार उक्त भिडियो प्राविधिक त्रुटिका कारण गल्तीवश हटाइएको जनाउँदै पुननः फिर्ता पठाएको छ ।
केही समयका लागि भिडियो फेसबुकबाट हटेपछि यसबारे विभिन्न प्रश्न उठेका थिए। प्रधानमन्त्री मोदीले उक्त भिडियो जुलाई २३ मा सार्वजनिक गरेका थिए। भिडियोमा उनले जेन–जी र विद्यार्थीलाई सम्बोधन गर्दै परीक्षा प्रश्नपत्र चुहावटविरुद्ध कडा कारबाही गर्ने प्रतिबद्धता व्यक्त गरेका थिए।
यसैबीच, समाचार संस्था आईएएनएसले स्रोतलाई उद्धृत गर्दै भारतको इलेक्ट्रोनिक्स तथा सूचना प्रविधि मन्त्रालयले मेटा (फेसबुक र इन्स्टाग्राम) का ग्लोबल प्रमुख तथा कम्पनीका ग्लोबल पब्लिक पोलिसी प्रमुखलाई स्पष्टीकरणका लागि बोलाएको दाबी गरेको छ।
प्रश्नपत्र चुहावटविरुद्ध कडा कदमको सन्देश
जुलाई २३ को मध्यरातमा एक्समा सार्वजनिक २ मिनेट ५६ सेकेन्ड लामो भिडियो सन्देशमा प्रधानमन्त्री मोदीले प्रश्नपत्र चुहावट लाखौं विद्यार्थी र उनीहरूका अभिभावकका लागि पीडादायी विषय भएको बताएका थिए।
उनले पछिल्ला करिब साढे दुई महिनामा दोषीलाई पक्राउ गरी जेल पठाइएको र विद्यार्थीको शैक्षिक वर्ष खेर जान नदिन छोटो समयमै २२ लाख विद्यार्थीको परीक्षा सम्पन्न गरिएको उल्लेख गरेका थिए। साथै, भविष्यमा यस्ता घटना रोक्न फास्ट ट्र्याक अदालत गठन गर्ने निर्देशन दिएको पनि बताएका थिए।
यो विषय मे ३ मा भएको नीट यूजी प्रश्नपत्र चुहावट प्रकरणसँग सम्बन्धित छ।
थप दुई भिडियो सन्देश
जुलाई २४ मा प्रधानमन्त्री मोदीले अर्को भिडियोमार्फत आफ्नो अघिल्लो सन्देशमा सकारात्मक प्रतिक्रिया र सुझाव दिने सबैलाई धन्यवाद दिएका थिए।
त्यसपछि जुलाई २६ मा उनले परीक्षा प्रणाली सुधारका लागि उच्चस्तरीय कार्यदल गठन गरिएको घोषणा गरे। छ सदस्यीय उक्त कार्यदलको अध्यक्षमा इन्फोसिसका सह-संस्थापक नन्दन निलेकणीलाई नियुक्त गरिएको छ।
प्रधानमन्त्रीले सरकारले विद्यार्थीको भविष्य सुरक्षित गर्न निरन्तर काम गरिरहेको र प्रश्नपत्र चुहावटमा संलग्न व्यक्तिहरू कानुनी कारबाही भोगिरहेको बताएका थिए।
आपत्तिजनक पोस्ट हटाउन प्रहरीको आग्रह
यसअघि दिल्ली प्रहरीले जन्तरमन्तर विद्यार्थी आन्दोलन तथा जुलाई २० को ‘संसद चलो’ मार्चका क्रममा प्रधानमन्त्रीविरुद्ध सामाजिक सञ्जालमा पोस्ट गरिएका आपत्तिजनक टिप्पणी र भिडियो हटाउन विभिन्न सामाजिक सञ्जाल प्लेटफर्मलाई सूचना जारी गरेको थियो।
मेटाले भिडियो कसरी हटाउँछ?
मेटाले कृत्रिम बुद्धिमत्ता (एआई) को सहयोगमा सम्भावित नियम उल्लंघन गर्ने सामग्री पहिचान गर्छ। आवश्यक परे मानव मोडरेटरले त्यसको समीक्षा गर्छन्।
यदि सामग्रीले कम्पनीको सामुदायिक मापदण्ड उल्लंघन गरेको ठहरिएमा हटाइन्छ। तर प्राविधिक वा अन्य कारणले गल्तीवश हटेको सामग्री समीक्षा पछि पुनः बहाल गरिने कम्पनीको प्रक्रिया रहेको छ।
