सुनसरी । सुनसरीको देवानगञ्ज गाउँपालिकामा दुई समुदायबीच उत्पन्न तनावका क्रममा भएको झडप र त्यसपछिका घटनाप्रति स्वतन्त्र पत्रकार संघ नेपाल, काठमाडौं जिल्ला शाखाले आफ्नो गम्भीर ध्यानाकर्षण भएको जनाएको छ।
मंगलबार एक प्रेस विज्ञप्ति जारी गर्दै संघले घटनामा ज्यान गुमाउनुभएका स्वर्गीय ओमप्रकाश मेहताप्रति हार्दिक श्रद्धाञ्जली अर्पण गर्दै शोकसन्तप्त परिवारजनप्रति गहिरो समवेदना व्यक्त गरेको छ। साथै, झडपका क्रममा घाइते भएका सर्वसाधारण नागरिक तथा सुरक्षाकर्मीहरूको शीघ्र स्वास्थ्यलाभको कामनासमेत गरिएको छ।
स्वतन्त्र पत्रकार संघ नेपाल, काठमाडौं जिल्ला शाखाका अध्यक्ष कृष्णराज तिमल्सिनाद्वारा हस्ताक्षरित विज्ञप्तिमा घटनाको निष्पक्ष, स्वतन्त्र र विश्वसनीय छानबिन गरी सत्यतथ्य तत्काल सार्वजनिक गर्न सरकारसँग माग गरिएको छ। संघले दोषीलाई कानुनबमोजिम कडा कारबाही गर्न र पीडित परिवारलाई उचित राहत तथा क्षतिपूर्ति उपलब्ध गराउनसमेत नेपाल सरकारको ध्यानाकर्षण गराएको छ।
यसैगरी, संघले यस्तो संवेदनशील र जटिल परिस्थितिमा सञ्चारमाध्यम, कार्यरत पत्रकार तथा सामाजिक सञ्जाल प्रयोगकर्ताहरूलाई विशेष संयमता अपनाउन आग्रह गरेको छ। अपुष्ट, भ्रामक र उत्तेजनात्मक सामग्री सम्प्रेषण नगरी सत्य, तथ्य र सन्तुलित समाचार मात्र प्रवाह गर्न अपिल गरिएको छ।
प्रेस तथा अभिव्यक्ति स्वतन्त्रताको सम्मान गर्दै सामाजिक सद्भाव, धार्मिक सहिष्णुता र राष्ट्रिय एकतालाई सुदृढ बनाउनु सबैको साझा दायित्व भएको उल्लेख गर्दै संघले शान्ति, कानुनी शासन, प्रेस स्वतन्त्रता र सामाजिक सद्भावका पक्षमा आफू सदैव दृढताका साथ उभिने प्रतिबद्धता व्यक्त गरेको छ।
