काठमाडौं । कुमारी बैंक लिमिटेड र नेपालस्थित प्रविधि कम्पनी कुराकानी अनलाइन प्रा.लि. (निम्बज)बीच ग्राहकलाई थप नवीन तथा डिजिटल सेवा उपलब्ध गराउने उद्देश्यले सहकार्य सम्झौता भएको छ । सम्झौताअनुसार निम्बजका अन्तर्राष्ट्रिय डेटा (ईसीम) तथा अन्तर्राष्ट्रिय ड्राइभिङ परमिट (आईडीपी) सम्बन्धी सेवाहरू कुमारी बैंकको मोबाइल बैंकिङ एपमा एकीकृत गरिएको बैंकले जनाएको छ ।
अब बैंकका ग्राहकहरूले मोबाइल बैंकिङ एपमार्फत सहज रूपमा अन्तर्राष्ट्रिय डेटा ईसीम प्याकेज खरिद गर्न तथा अन्तर्राष्ट्रिय ड्राइभिङ परमिटका लागि आवेदन दिन सक्नेछन् । यो सेवा विशेष गरी विदेश यात्रा गर्ने नेपाली, उच्च शिक्षा अध्ययनका लागि विदेश जाने विद्यार्थी, वैदेशिक रोजगारीमा रहेका नेपाली तथा व्यवसायिक प्रयोजनका लागि नियमित विदेश आवतजावत गर्ने ग्राहकका लागि उपयोगी हुने बैंकको विश्वास छ ।
ईसीम सेवाले विदेश पुगेपछि स्थानीय सिम कार्ड खरिद वा परिवर्तन गर्नुपर्ने झन्झट हटाउँदै सहज रूपमा डेटा सेवा प्रयोग गर्न सकिने सुविधा दिनेछ । त्यस्तै, आईडीपी सेवाले अन्तर्राष्ट्रिय ड्राइभिङ अनुमति प्राप्त गर्ने प्रक्रियालाई सरल, छिटो र व्यवस्थित बनाउने अपेक्षा गरिएको छ ।
यस सेवाको अर्को विशेषता ग्राहकहरूले ईसीम तथा आईडीपी सेवाको शुल्क कुमारी बैंक मोबाइल बैंकिङ एपमार्फत नेपाली रुपैयाँमै भुक्तानी गर्न सक्ने सुविधा हो । यसले विदेशी मुद्रा भुक्तानीका वैकल्पिक माध्यम खोज्नुपर्ने आवश्यकता कम गर्दै सम्पूर्ण प्रक्रिया थप सहज र सुरक्षित बनाउने बैंकले जनाएको छ ।
२५ वर्षदेखि बैंकिङ सेवा प्रदान गर्दै आएको कुमारी बैंकले हाल देशभर २८५ शाखा, ४१ विस्तार काउन्टर, ३०३ एटीएम र ४० शाखारहित बैंकिङ सेवामार्फत लाखौँ ग्राहकलाई सेवा दिँदै आएको छ ।
