काठमाडौँ । श्रावण १५ अर्थात् खीर खाने विशेष दिनको शुभ अवसरमा सहाराको पर्खाइमा रहेका बालबालिकाहरूलाई लक्षित गरी विशेष परिकार खुवाउने कार्यक्रम सम्पन्न भएको छ। लाइभ नेपाल नेटवर्क प्रा. लि. र आईसीटी पत्रकार विकास मञ्चको सहकार्यमा विभिन्न समाजसेवीहरूको सहयोग जुटाई ‘रक्षा नेपाल’ मा आश्रित छोरीहरू तथा ‘मातृभूमि नेपाल बाल गृह’का बालबालिकाहरूलाई खीर, दूध, मासु र मिठाई लगायतका परिकार उपलब्ध गराई पर्व मनाइएको हो।
‘प्रोजेक्ट ० इन्भेस्टमेन्ट’ (जिरो इन्भेस्टमेन्ट) को अवधारणा अनुसार पूर्ण रूपमा आपसी सहकार्य र व्यक्तिगत सहयोगमा यो कार्यक्रम सम्पन्न गरिएको हो। कार्यक्रमका लागि नुवाकोट डेरीका सञ्चालक देवराज बजगाईं, पूर्व वडा अध्यक्ष एवं समाजसेवी मनोज घिमिरे र रञ्जन घिमिरेले दूध उपलब्ध गराउनुभएको थियो । त्यसै गरी व्यवसायी तथा समाजसेवी बद्री बस्नेतले मासु तथा आईसीटी पत्रकार विकास मञ्चका ‘प्रोजेक्ट ० इन्भेस्टमेन्ट’का अवधारणाकार, समाजसेवी एवं व्यवसायी गणेश रायले मिठाईको व्यवस्था गरिदिनुभएको थियो।
ध्रुव तिवारी (व्यवसायी तथा समाजसेवी): कार्यक्रम सम्पन्न गर्न मुख्य समन्वय र अभिभावकीय भूमिका। (उहाँले लामो समयदेखि विभिन्न बालआश्रमहरूमा यस्ता चाडपर्वहरूमा निरन्तर सहयोग पुर्याउँदै आउनुभएको छ।)
कार्यक्रमका सम्बन्धमा बोल्दै लाइभ नेपाल नेटवर्क प्रा. लि.का अध्यक्ष तथा समाजसेवी पुष्कर राज पाण्डेले “सेवा नै धर्म हो” भन्ने मूल मर्मलाई आत्मसात् गर्दै आफूहरूले संस्थागत तथा व्यक्तिगत तवरमा यस्ता सामाजिक कार्य गर्दै आएको बताउनुभयो।
उक्त परोपकारी कार्यक्रमको संयोजन पत्रकार तथा समाजसेवी साबित्री बस्नेतले गर्नुभएको थियो। कार्यक्रममा समाजसेवी गोविन्द भुसाल, सञ्जय श्रेष्ठ लगायतका व्यक्तित्वहरूको समेत उपस्थिति रहेको थियो। व्यवसायी तथा समाजसेवी ध्रुव तिवारीको योगदानको प्रशंसा गर्दै अन्य सम्पूर्ण सहयोगी मनहरूलाई पनि यसै गरी सामाजिक सेवामा अग्रसर हुन प्रेरणा मिलोस् भन्ने कामना गरियो। विभिन्न चाडपर्व तथा विशेष अवसरहरूमा यस संस्थाले व्यक्तिगत तथा संस्थागत सहकार्यमार्फत यस्ता सामाजिक गतिविधिहरू निरन्तर सञ्चालन गर्दै आएको र आगामी दिनमा पनि निरन्तरता दिने जनाएको छ।
