महिला शिक्षा र सशक्तीकरणमा हातेमालो: टोखाको चेतना महिला विद्यालयलाई नेपाल एसबिआई मर्चेन्ट बैंकको प्रिन्टर हस्तान्तरण

काठमाडौं, टोखा। नेपाल एसबिआई मर्चेन्ट बैंकिङ लिमिटेडले आफ्नो संस्थागत सामाजिक उत्तरदायित्व (CSR) कार्यक्रमअन्तर्गत टोखा नगरपालिका–९ स्थित चेतना महिला माध्यमिक विद्यालयलाई एक थान प्रिन्टर हस्तान्तरण गरेको छ। विद्यालयमा अध्ययनरत आमा तथा दिदीबहिनीहरूको पठनपाठन र दैनिक प्रशासनिक कार्यलाई थप सहज बनाउने उद्देश्यले उक्त सहयोग प्रदान गरिएको हो।

‘प्रोजेक्ट जिरो इन्भेस्टमेन्ट’ र महिला शिक्षाको प्रवर्द्धन

ICT पत्रकार विकास मञ्चअन्तर्गत सञ्चालित ‘प्रोजेक्ट जिरो इन्भेस्टमेन्ट’ (Project Zero Investment) को अवधारणाबमोजिम अध्ययनरत महिला तथा दिदीबहिनीहरूको सिकाइ यात्रालाई अगाडि बढाउने उद्देश्यले यो पहल गरिएको हो। लाइभ नेपाल नेटवर्क प्रा.लि.का अध्यक्ष तथा समाजसेवी पुष्करराज पाण्डेले सो अवधारणाअनुसार सामाजिक सहकार्यमार्फत महिला शिक्षालाई प्रवर्द्धन गर्ने अभियानको निरन्तर नेतृत्व गर्दै आउनुभएको छ। नेपाल एसबिआई मर्चेन्ट बैंकले गरेको यो सहयोग सोही बृहत् अभियानको एउटा महत्त्वपूर्ण र सार्थक अंश हो।

सामग्री हस्तान्तरण र बैंकको प्रतिबद्धता

प्रिन्टर नेपाल एसबिआई मर्चेन्ट बैंकिङ लिमिटेडका प्रमुख कार्यकारी अधिकृत (CEO) सन्तोष कुमार भण्डारीले विद्यालय व्यवस्थापनलाई हस्तान्तरण गर्नुभयो। कार्यक्रममा बैंकका विजय महर्जनको समेत विशेष उपस्थिति रहेको थियो।

सो अवसरमा CEO भण्डारीले महिला शिक्षाको क्षेत्रमा योगदान गर्न पाउँदा खुसी व्यक्त गर्दै अध्ययनरत आमा तथा दिदीबहिनीहरूको सिक्ने चाहना, संघर्ष र आत्मविश्वास अनुकरणीय रहेको बताउनुभयो। उहाँले बैंकको तर्फबाट आगामी दिनमा पनि यस्ता सामाजिक र शैक्षिक सहयोगलाई निरन्तरता दिने प्रतिबद्धता जनाउनुभयो। बैंकका प्रतिनिधि विजय महर्जनले शिक्षा क्षेत्रमा प्रत्यक्ष सहकार्य गर्न पाउनु बैंकका लागि गौरवको विषय भएको उल्लेख गर्नुभयो।

स्थानीय प्रतिनिधि तथा अतिथिहरूको भनाइ

टोखा नगरपालिका–९ का वडा अध्यक्ष रामभक्त घिमिरेले चेतना महिला विद्यालयले वर्षौंदेखि आमा तथा दिदीबहिनीहरूलाई शिक्षाको उज्यालो बाँड्दै आएको उल्लेख गर्दै बैंकप्रति धन्यवाद व्यक्त गर्नुभयो। उहाँले शिक्षामा गरिएको लगानीले भविष्य उज्ज्वल बनाउने धारणा राख्नुभयो।

कार्यक्रमका समन्वयकर्ता पुष्करराज पाण्डेले बैंकप्रति आभार व्यक्त गर्दै बैंकिङ, सरकारी तथा सामाजिक क्षेत्र मिलेर शिक्षा र सशक्तीकरणमा जोड दिनुपर्ने बताउनुभयो। उहाँले यस विद्यालयबाट अध्ययन गरेका धेरै महिलाहरू आज समाजका विभिन्न क्षेत्रमा डाक्टर, नर्स, शिक्षक तथा उच्च पदमा पुगिसकेको प्रेरणादायी उदाहरण प्रस्तुत गर्नुभयो।

त्यसैगरी, राष्ट्रिय अभिभावक संघका केन्द्रीय सदस्य तथा समाजसेवी गोविन्द प्रसाद भुसाल र समाजसेवी एवं व्यवसायी मीनबहादुर गुरुङले महिला शिक्षामा गरिएको यस्तो लगानीले समग्र समाजको विकासमा सकारात्मक प्रभाव पार्ने विचार व्यक्त गर्नुभयो।

विद्यालय परिवारको खुसी र आभार

विद्यालयका प्रधानाध्यापक शान्ता प्रधान र सहायक प्रधानाध्यापक उर्मिला अमात्यले वार्षिक परीक्षा सञ्चालन भइरहेको समयमा प्रिन्टरको अत्यन्तै आवश्यकता परेको बेला सो सहयोग प्राप्त हुनु विद्यालयका लागि ठूलो राहत र खुसीको विषय बनेको बताउनुभयो। यसले परीक्षा व्यवस्थापन र दैनिक प्रशासनिक कार्यलाई धेरै सहज बनाउने उहाँहरूले उल्लेख गर्नुभयो।

सञ्चालन र उत्साहजनक उपस्थिति

कार्यक्रमको सञ्चालन पत्रकार तथा समाजसेवी सावित्री बस्याल (साबु) ले गर्नुभएको थियो। उहाँले लामो समयदेखि महिला तथा दिदीबहिनीहरूको शिक्षा, स्वास्थ्य तथा आत्मनिर्भरताका लागि विभिन्न सचेतनामूलक तथा सशक्तीकरणका कार्यक्रमहरू आयोजना गर्दै निरन्तर पहलकदमी लिँदै आउनुभएको छ।

उक्त कार्यक्रममा विद्यालयमा अध्ययनरत विद्यार्थीहरू, शिक्षक-शिक्षिका, अभिभावक तथा सम्बन्धित निकायका प्रतिनिधिहरूको उल्लेख्य र उत्साहजनक उपस्थिति रहेको थियो।