काठमाडौं । प्रदर्शनरत फिल्म ‘गौँथली’ले बक्स अफिसमा २० करोडको आँकडा पार गरेको छ । यसले फिल्म क्षेत्रमा नयाँ उत्साह थपेको छ । प्रदर्शनको तयारीमा रहेका फिल्मका मेकरहरूमा थप आशा पलाएको छ ।
हलमा ‘गौँथली’सहित तीन नेपाली फिल्म ‘हली’ र ‘कमला मिस’ प्रदर्शनरत छन् । दुईको व्यापार दयनीय छ । ‘गौँथली’ यो वर्षको हिट र सर्वाकालीन चौथो हिट बनिसक्यो ।
‘हली’ र ‘कमला मिस’को अकुपेन्सी हेर्दा लाग्छ– दर्शकलाई फिल्म आएको र गएको पत्तो छैन ।
साउन फिल्म प्रदर्शनका लागि उपयुक्त महिना होइन । वर्षाका जोखिमले छायाङ्कन लगायतका गतिविधि पनि कम हुन्छन् । यो पटक पनि त्यही भयो ।
तर, साउन अन्तिम आइपुग्दा भदौमा प्रदर्शन मिति तोकिएका फिल्महरूका प्रचार केन्द्रित गतिविधि बढ्न थालेका छन् । ‘गौँथली’को व्यापार र फिल्मी गतिविधिले मनोरञ्जन क्षेत्र चलायमान छ ।
‘झिँगेदाउ २’को चर्चा
असोज २ गते प्रदर्शन मिति तोकिएको फिल्म ‘झिँगेदाउ’को टिजर पाँच दिनअघि सार्वजकिन भएको थियो ।
यो टिजरले युट्युबमा १० लाख भ्युज पाएको छ । पछिल्लो समय कम अवधिमा यति धेरै भ्युज पाउने टिजर यही हो ।
नायिका केकी अधिकारी र आँचल शर्माले निर्वाह गरेको पात्रबीचको घरझगडा यो टिजरको मुख्य आकर्षण हो ।
यो फिल्मको टिजरले फिल्म पुरानै धारमा बनेको संकेत गर्छ । तथापि टिजर मन पराइएको छ ।
दुई फिल्म निर्माणको घोषण
फिल्म ‘परान’बाट सफल निर्देशकको छवि बनाएका दीपक आचार्यले दोस्रो फिल्म ‘चिरञ्जीवी भवः’को सुटिङ सकेका छन् ।
यो फिल्ममा नायक आशीर्वाद क्षेत्री र डेब्यू नायिका प्रशंसा रायमाझी छन् ।
त्यस्तै, निर्देशक सौरभ चौधरीले नायक सौगात मल्ललाई लिएर फिल्म ‘साम्राज्य’ बनाउने घोषणा गरेका छन् ।
त्यस्तै, ‘गौँथली’ नायक अरुण क्षेत्रीले कलाकार मदनकृष्ण श्रेष्ठको बायोपिकका लागि अनुबन्ध भएका छन् । उनी मदनकृष्णका मिल्ने साथी हरिवंशको भूमिकामा अनुबन्ध भएका छन् ।
अरुणले एक साथ दुई फिल्म साइन गरेका हुन् । निर्देशक मिलन चाम्सले मदनकृष्णको पछि हरिवंशको पनि बायोपिक बनाउने चर्चा छ ।
सार्वजनिकको लहर
गत साताका र यो साताका सुरुवाती दुई दिनमा भएका रिलिज गतिविधिबारे यहाँ चर्चा गरिएको छ ।
नायिका नीता ढुंगानाको होम प्रोडक्सनमा बनेको फिल्म ‘पार्वती’को गीत ‘दिदी’ सोमबार सार्वजनिक भएको छ ।
नायक सुशील सिटौला र नायिका न्यान्सी खड्का शीर्ष भूमिकामा रहेको फिल्म ‘अक्षरा’को टिजर सोमबार सार्वजनिक भएको छ । महिलामाथि हुने हिंसाको कथामा फिल्म बनेको टिजरले बताउँछ ।
त्यस्तै, नायक दयाहाङ राई स्टारर फिल्म ‘पेन्सन पट्टा’ को टिजर पनि यही अवधिमा सार्वजनिक भयो । पेन्सन पट्टमा नाम नमिल्दाको घटनामा वरपर टिजर घुमेको छ । यो फिल्मको टिजरले अर्ग्यानिक कथा पस्कने आभास दिलाउँछ ।
त्यस्तै, फिल्म ‘जलाकी’को गीत ‘चाँदी जलप’ पनि सार्वजनिक भएको । गीतको भिडियोमा नायक सोनम तोप्देन र नायिका उपासनासिंह ठकुरी केन्द्रमा छन् ।
प्रदर्शनको तयारीमा रहेको फिल्म ‘लज्जावती’को गीत ‘मलाई पीर परेको तिमीलाई के थाहा छ’ पनि यही अवधिमा सार्वजनिक भयो ।
नायिका प्रियंका कार्कीको होम प्रोडक्सनमा बनेको फिल्म ‘मास्टर्नी’को टिजर गत साता सार्वजनिक भयो । टिजरले फिल्म क्राइम सन्पेन्स कथामा बनेको प्रष्ट पारेको छ ।
नायक निखिल उप्रेतीको निर्देशनमा बनेको फिल्म ‘आचार्य’ को टिजरले पनि यो अवधिमा राम्रै आलोचना खेप्यो । कमजोर भीएफएक्सले यो फिल्मको इमेजमै असर गरेको छ ।
फिल्म ‘कार्की साइँला’को गीत ‘लग्यौ परान’मा पनि सार्वजनिक भएको छ । गीतको भिडियोमा फिल्मका शीर्ष पात्र जितु नेपाल र प्रियना आचार्यको नृत्य छ ।
