काठमाडौं । नेपाल उद्योग वाणिज्य महासंघ (एफएनसीसीआई) का निवर्तमान अध्यक्ष तथा आइएमई ग्रुपका अध्यक्ष चन्द्रप्रसाद ढकालले कोरियाबाट फर्किएका रिटर्नी उद्यमीहरूको सीप, अनुभव र पुँजीलाई नेपालको आर्थिक रूपान्तरणको महत्वपूर्ण आधार बनाउनुपर्ने बताएका छन् ।
नेपाल–कोरिया उद्यमी व्यवसायी संघले आयोजना गरेको अन्तरक्रिया कार्यक्रममा प्रमुख अतिथिका रूपमा बोल्दै ढकालले नेपाल र गणतन्त्र कोरियाबीचको सम्बन्ध कूटनीतिक तथा सांस्कृतिक सम्बन्धमा मात्र सीमित नभई आर्थिक र व्यावसायिक साझेदारीको जीवन्त उदाहरण बनेको बताए ।
उनले हजारौं नेपाली युवाले कोरियामा काम गरेर हासिल गरेको सीप, अनुभव, कार्यसंस्कृति र पुँजी नेपालको उद्यमशीलता विकासका लागि महत्त्वपूर्ण सम्पत्ति भएको बताए ।
कोरियाले करिब ६० वर्षको अवधिमा गरिबीबाट औद्योगिक शक्तिका रूपमा गरेको रूपान्तरणबाट नेपालले पनि महत्वपूर्ण पाठ सिक्न सक्ने उनको भनाइ थियो ।
कोरियाले अपनाएको अनुशासित कार्यसंस्कृति, गुणस्तरमा जोड, प्रविधिको विकास, निर्यातमुखी उत्पादन तथा सरकार र निजी क्षेत्रबीचको समन्वय नेपालका लागि पनि उपयोगी हुने ढकालले बताए ।
रिटर्नी उद्यमीहरूले विदेशमा सिकेको अनुशासन र उत्पादकत्वमा आधारित कार्यसंस्कृति स्वदेशी उद्योगमा लागू गर्न सके नेपालको औद्योगिक चरित्रमै परिवर्तन ल्याउन सकिने उनले धारणा राखे ।
त्यस्तै, जलविद्युत्, कृषि प्रशोधन, पर्यटन, सूचना प्रविधि तथा साना–मझौला उत्पादनमूलक क्षेत्रमा नेपालमा लगानीको ठूलो सम्भावना रहेको उल्लेख गर्दै ढकालले भारत र चीनसँगको भौगोलिक निकटता तथा सुधार हुँदै गएको लगानी वातावरणले नेपाललाई क्षेत्रीय उत्पादन केन्द्रका रूपमा विकास गर्ने अवसर दिएको बताए ।
लगानीमैत्री नीति निर्माण तथा एकद्वार सेवाका लागि निजी क्षेत्रले सरकारसँग निरन्तर संवाद गरिरहेको उल्लेख गर्दै उनले यस्तो अभियानलाई थप तीव्र बनाउनुपर्नेमा जोड दिए ।
ढकाका अनुसार, देशभर छरिएर रहेको सानो पुँजीलाई एकीकृत गरी ठूला आयोजनामा लगानी गर्ने उद्देश्यले १० अर्ब रुपैयाँ पुँजीको नेपाल डेभलपमेन्ट कम्पनी लिमिटेड स्थापना गरिएको छ ।
नयाँ व्यवसाय सुरु गर्न चाहने रिटर्नी उद्यमीका लागि उक्त कम्पनी लगानी साझेदार बन्न सक्ने र सानो पुँजी भएका लगानीकर्ताले नेपाल डेभलपमेन्ट पब्लिक लिमिटेडमार्फत समेत लगानी गर्न सक्ने उनले बताए ।
रिटर्नी उद्यमी तथा व्यवसायीसँग रहेको प्राविधिक सीप, कार्यसंस्कृति र आर्थिक अनुशासन नेपालको उद्योग क्षेत्रका लागि महत्त्वपूर्ण हुने उनको भनाइ छ ।
स्वदेशमा उद्यम स्थापना गर्दा देखिने कानुनी तथा प्रक्रियागत अवरोध सरकार, निजी क्षेत्र र अन्य सरोकारवालाबीच नियमित संवादमार्फत समाधान गर्न सकिने ढकालले बताए ।
रिटर्नी उद्यमीहरूको लगानी र सीपले स्वदेशमा उत्पादन, रोजगारी र समृद्धिको नयाँ अध्याय सुरु गर्ने विश्वास व्यक्त गर्दै ढकालले एफएनसीसीआई र आइएमई ग्रुपका तर्फबाट निरन्तर साथ र सहयोग रहने प्रतिबद्धता जनाए ।
कार्यक्रममा नेपालका लागि कोरियाका राजदूत, कोरियाली दूतावासका प्रतिनिधि, नेपाल सरकारका प्रतिनिधि, रिटर्नी माइग्रेन्ट तथा विभिन्न क्षेत्रका उद्यमी व्यवसायीहरूको उपस्थिति रहेको थियो ।
