काठमाडौँ– अमेरिकामा आज मध्यावधि निर्वाचन हुँदैछ । राष्ट्रपति डोनाल्ड ट्रम्पको दोस्रो कार्यकालको दुई वर्ष पूरा हुन लाग्दा हुन लागेको यो निर्वाचनलाई उनको नेतृत्व र नीतिप्रति अमेरिकी मतदाताको जनमत परीक्षणका रूपमा हेरिएको छ।
यो निर्वाचनबाट अमेरिकी संसद् कंग्रेसका दुवै सदन (प्रतिनिधिसभा र सिनेट) को शक्ति सन्तुलन निर्धारण हुनेछ ।
निर्वाचनमा प्रतिनिधिसभाका ४३५ सिट र सिनेटका १०० मध्ये ३५ सिटका लागि मतदान हुन लागेको हो । सिनेटका ३३ नियमित सिट, दुई विशेष निर्वाचन र ३६ राज्यमा गभर्नर चयनका लागि पनि मतदान हुनेछ ।
अमेरिकी निर्वाचन आयोगका अनुसार यस निर्वाचनमा मतदाताले आफ्नो राज्य र निर्वाचन क्षेत्रअनुसार संघीय, राज्य तथा स्थानीय तहका प्रतिनिधि चयन गर्नेछन् । यस मध्यावधि निर्वाचनमा ५ करोड ६० लाखभन्दा बढी मतदाताले यसअघि नै अग्रिम मतदान गरिसकेका छन् ।
निर्वाचनमा इरानसँगको युद्ध र अमेरिकी विदेश नीति, अर्थतन्त्र, जीवनयापनको लागत र आप्रवासन मुख्य मुद्दाका रूपमा रहेका छन् । जीवनयापनको बढ्दो लागतका बारेमा डेमोक्रेट र रिपब्लिकन दुवैका समान चासोहरू रहे पनि हालका सर्वेक्षणहरूले अर्थतन्त्र, राष्ट्रपति डोनाल्ड ट्रम्प र अन्य प्रमुख मुद्दाहरूलाई उनीहरूले हेर्ने दृष्टिकोणमा भिन्नता रहेको देखाएका छन् ।
यदि डेमोक्र्याटहरूले प्रतिनिधिसभा वा सिनेटमध्ये कुनै एक सदनमा बहुमत हासिल गरे भने ट्रम्प प्रशासनका नीति तथा निर्णयमाथि संसदीय अवरोध र अनुसन्धान बढ्न सक्छ।
तर रिपब्लिकनहरूले आफ्नो बहुमत जोगाउन सके ट्रम्पलाई कार्यकालको बाँकी दुई वर्षमा आफ्नो एजेन्डा अघि बढाउन सहज हुनेछ।
अमेरिकी संघीय निर्वाचन आयोगका अनुसार मतदानको आधिकारिक मिति नोभेम्बर ३ हो। प्रारम्भिक नतिजा आजै आउन सक्ने भए पनि प्रतिस्पर्धा कडा भएका क्षेत्रमा मतगणना र अन्तिम प्रमाणीकरणका लागि केही दिनदेखि केही हप्तासम्म लाग्न सक्छ।
रिपब्लिकन पार्टीको प्रतिनिधिसभा र सिनेट दुवैमा बहुमत छ भने डेमोक्रेटिक पार्टीका लागि दुवै सदनमा आफ्नो उपस्थिति बलियो बनाउनु पर्ने दबाब छ । तल्लो सदनमा बहुमतका लागि डेमोक्रेटिकलाई अहिलेको सिट संख्याबाट ४ सिट बढाए पुग्छ । माथिल्लो सदन सिनेटको प्रतिस्पर्धा भने रोचक हुने सर्वेक्षणहरुले देखाएका छन् ।
यो निर्वाचनको नतिजाले सन् २०२८ मा हुने अमेरिकी राष्ट्रपतीय निर्वाचनअघि दुवै दलको राजनीतिक रणनीति र शक्ति सन्तुलनमा प्रभाव पार्न सक्नेछ ।
