युरोपियन युनियन सदस्य राष्ट्रका राजदूतहरूको नेपाल भ्रमण सुरु, तीनदिने कार्यक्रममार्फत सहकार्य विस्तारमा जोड

काठमाडाैं, ६ जेष्ठ । युरोपेली संघ (ईयू) को नेपालस्थित प्रतिनिधिमण्डलले भारतस्थित युरोपेली संघ सदस्य राष्ट्रहरूका २१ जना राजदूत तथा प्रतिनिधिहरूलाई वार्षिक प्रमुख मिशन (Heads of Mission – HoM) भ्रमण अन्तर्गत नेपालमा स्वागत गरेको छ।

ईयूद्वारा जारी विज्ञप्तिअनुसार, मे १९ देखि २१ तारिखसम्म तीनदिने नेपाल भ्रमणमा रहेका यी उच्चपदस्थ प्रतिनिधिहरूले नेपालस्थित ईयू राजदूतहरूसँग मिलेर ‘टिम युरोप’ (Team Europe)को भावना अनुरूप नेपालसँगको सहकार्य र सम्बन्ध मजबुत बनाउने उद्देश्य राखिएको छ।

उच्चस्तरीय भेटघाट र क्षेत्रीय अवलोकन

भ्रमणको क्रममा युरोपेली प्रतिनिधिहरूले प्रधानमन्त्री केपी शर्मा ओली तथा परराष्ट्रमन्त्रीसँग भेटवार्ता गर्दै नेपालको आन्तरिक र बाह्य नीतिसम्बन्धी विषयमा छलफल गरेका छन्। साथै उनीहरूले सिविल सोसाइटी संगठनहरू, सञ्चारमाध्यम तथा निजी क्षेत्रका उच्च प्रतिनिधिहरूसँग पनि अन्तरक्रिया गर्ने कार्यक्रम रहेको छ।

विकास र नवप्रवर्तनमा सहकार्यको चर्चा

युरोपेली प्रतिनिधिमण्डलको कार्यक्रम नेपालका राजनीतिक, सामाजिक तथा आर्थिक प्राथमिकता बुझ्नमा केन्द्रित रहेको बताइएको छ। कार्यक्रममा नेपाल विद्युत प्राधिकरण, प्रविधि र क्रियटिभ उद्योगहरूका अगुवा कम्पनीहरूको भ्रमण तथा पाटन र भक्तपुरका ऐतिहासिक स्थलहरूको अवलोकन पनि समावेश गरिएको छ।

युरोपेली राष्ट्रका लागि यस भ्रमणमार्फत नेपालमा हरित विकास, सुसाशन, नवप्रवर्तन, समावेशी विकास तथा जलवायु सम्बन्धी कार्यहरूमा सहकार्यका नयाँ सम्भावनाहरूको पहिचान गरिने बताइएको छ।

सहकार्यको नयाँ अध्याय

ईयू प्रतिनिधिमण्डलका अनुसार, यस्ता भ्रमणले सदस्य राष्ट्रहरूलाई नेपालको वर्तमान परिस्थिति र भविष्यका प्राथमिकताबारे प्रत्यक्ष जानकारी दिने तथा नेपाल–युरोपबीचको सम्बन्ध अझ सुदृढ बनाउने अवसर प्रदान गर्छ।