काठमाडौं । महानायकको छवि बनाएका राजेश हमालले गत जेठमा ९ वर्षपछि फुलफ्लेज हिरो भएर ठूलो पर्दामा कमब्याक गरे ।
वि.सं २०७३ मा प्रदर्शनमा आएको फिल्म ‘सकुन्तला’ यता उनी ठूलो पर्दाको अभिनयमा निस्क्रिय बनेका थिए ।
तर, उनी ठूलो पर्दाबाट चटक्कै टाढा भने थिएनन् । केही फिल्ममा उनी अथितीय भूमिका देखिएका थिए ।
उनी लगातार फिल्म फ्लप बन्न लागेपछि ठूलो पर्दाको अभिनयबाट टाढिएका थिए । यो कुरा उनले सार्वजनिक मञ्चमै स्वीकार गरेका छन् ।
कमब्याक फिल्म ‘नरसिंहा : अभतार’ जेठ ९ मा प्रदर्शनमा आयो । तर, यसको व्यापारिक आकँडा र समीक्षा हेर्दा उनको कमब्याक सुखद रहेन ।
चलचित्र विकास बोर्डका अनुसार यो फिल्मको ग्रस कलेक्सन एक करोड ७५ लाख ६० हजार १७६ छ । यो फिल्म हेर्न ६३ हजार २८२ जना दर्शक हलमा पुगेको तथ्यांकमा देखिन्छ ।
समीक्षकहरु पनि हमालको कमब्याकमा सन्तुष्ट देखिएनन् ।
यता, बक्स अफिस कलेक्सनबाट यो फिल्मको लगानी सुरक्षित भएको पाइँदैन । व्यापारिकरुपमा फ्लप भएको छ ।
यस अर्थमा महानयकको कमब्याक फ्लप बनेको छ ।
फिल्म ‘नरसिंहा : अभतार’का कलाकाहरु
फ्लप मध्येको बढी व्यापार गर्ने फिल्म
चलचित्र विकास बोर्डका अनुसार जेठ महिनामा पाँच फिल्म ‘हेल्लो काँशीराम’, ‘के घर के डेरा : घर नम्बर २’, ‘नरसिंहा अभतार’, ‘जन्ते बाख्रो’ र ‘महाभोज’ प्रदर्शनमा आएका छन् ।
यी मध्ये ‘महाभोज’ र ‘जन्ते बाख्रो’ प्रदर्शनरत छन् । ‘महाभोज’को पनि व्यापार कमजोर छ । पहिलो साता यसले ५७ लाखभन्दा केही बढीको मात्रै व्यापार गरेको छ ।
जेठ २३ बाट प्रदर्शनरत ‘जन्ते बाख्रो’ले असार पहिलो सातासम्म करिब ३६ लाखको व्यापार गरेको छ ।
यी दुई फिल्म पनि फ्लप उन्मुख नै छन् । लाइफ टाइम ग्रस कलेक्स एक करोड पुर्याउन पनि यी फिल्मलाई मुस्किल पर्ने देखिन्छ । यी दुवै फिल्मको सुरुवाती साताका व्यापार कमजोर हो ।
अन्य तीन फिल्म ‘हेल्लो काँशीराम’, ‘घर नम्बर २’ र ‘नरसिंहा : अभतार’ हलमा उत्रिसकेका छन् ।
‘हेल्लो काँशीराम’को व्यापार त बिजोग नै छ । यसको ग्रस कलेक्सन जम्मा २६ हजार ९०० मात्रै छ । यो फिल्म हेर्न ११० जना मात्रै हलमा पुगेका छन् ।
बक्स अफिस रिपोर्ट हेर्दा ‘घर नम्बर २’ पनि फ्लप भएको छ । यसले लाइफटाइम ग्रस कलेक्सन ५७ लाख ७० हजार ७३२ मात्रै छ ।
‘नरसिंहा : अभतार’बाहेक जेठमा प्रदर्शनमा आएका सबै फिल्मको व्यापार लाखमै सीमित छ ।
करोडमा व्यापार गर्ने एक्लो फिल्म ‘नरसिंहा : अभतार’ हो । अर्थात्, जेठमा प्रदर्शनमा आएका फ्लप फिल्महरुमा सबैभन्दा बढी व्यापार गर्ने फिल्म यही हो ।
