काठमाडौँ । सूचना प्रविधिको माध्यमबाट देशको शैक्षिक क्षेत्रमा एउटा नयाँ इँटा थप्ने उद्देश्यका साथ आइसिटी पत्रकार विकास मञ्चको आयोजनामा नागार्जुनस्थित ठूलागाउँ माध्यमिक विद्यालयको प्राङ्गणमा ‘नमुना कक्षा सञ्चालन तथा शैक्षिक एवं प्राविधिक सामग्री हस्तान्तरण समारोह’ भव्य रूपमा सम्पन्न भएको छ। मञ्चद्वारा अघि सारिएको ‘प्रोजेक्ट जिरो इन्भेष्टमेन्ट’ (Project Zero Investment) को सुन्दर अवधारणालाई साकार पार्दै कक्षा ७ का विद्यार्थीहरूका लागि आवश्यक अत्याधुनिक शैक्षिक तथा डिजिटल सामग्रीहरू हस्तान्तरण गरिएको हो।
कार्यक्रमको सभापतित्व आइसिटी पत्रकार विकास मञ्चका अध्यक्ष एवं समाजसेवी पुस्कर राज पाण्डेले गर्नुभएको थियो भने मुख्य अतिथिको रूपमा नेपाली चलचित्र जगत्का महानायक श्री राजेश हमाल हुनुहुन्थ्यो।
कार्यक्रममा आफ्ना भनाइहरू राख्दै मुख्य अतिथि महानायक राजेश हमालले शिक्षा नै संसार बदल्ने सबैभन्दा शक्तिशाली हतियार भएको बताउनुभयो। उहाँले भन्नुभयो, “परम्परागत शिक्षालाई प्रविधिसँग जोड्न सके मात्र हाम्रा बालबालिकाहरू अन्तर्राष्ट्रिय बजारमा प्रतिस्पर्धी हुन सक्छन्। ‘प्रोजेक्ट जिरो इन्भेष्टमेन्ट’ मार्फत सरकारी विद्यालयका विद्यार्थीले प्रविधि सिक्न पाउनु ऐतिहासिक सुरुवात हो। यी बालबालिका नै भोलिको देश हुन्।”
तारकेश्वर नगरपालिकाका नगर प्रमुख (मेयर) कृष्ण हरि महर्जनले शिक्षा क्षेत्रको विकासका लागि नीतिगत तहबाट गर्नुपर्ने सम्पूर्ण सहयोगका लागि आफू प्रतिबद्ध रहेको र यस्ता उदाहरणीय कार्यले सामुदायिक विद्यालयको स्तर उकास्ने विश्वास व्यक्त गर्नुभयो। तारकेश्वरलाई शिक्षा र समृद्धिको नमूना नगर बनाउन अहोरात्र खटिरहेको उल्लेख गर्दै स्थानीय सरकारको तर्फबाट पूर्ण ऐक्यबद्धता र आगामी दिनमा पनि यस्ता प्रविधिमैत्री अभियानलाई नगरले प्रोत्साहन गर्ने बताउनुभयो।यो नमुना कक्षाले विद्यार्थीहरूको सिकाउ सिकाइमा प्रत्यक्ष र सकारात्मक प्रभाव पार्ने उल्लेख गर्नुभयो। विद्यालयका प्रधानाध्यापक अर्जुन फुयाँल र सह-प्रधानाध्यापक शिव प्रसाद फुयाँलले शून्यबाट सुरु गरेर सङ्घर्ष गर्दै विद्यालयलाई यो भव्य अवस्थासम्म ल्याइपुर्याएको स्मरण गर्दै विद्यार्थीहरुलाई आवश्यक सबै सामाग्री उपलब्ध गराएकोमा आयोजक र दाताहरू प्रति हार्दिक आभार प्रकट गर्नुभयो।
परियोजनालाई सफल बनाउन निःस्वार्थ भावनाले सहयोग गर्ने प्रमुख दाता एवं समाजसेवी तथा व्यवसायी गणेश रायले आइसिटी पत्रकार विकास मञ्च र ‘प्रोजेक्ट जिरो इन्भेष्टमेन्ट’ को उद्देश्यमाथि प्रकाश पार्दै बालबालिकाको उज्यालो भविष्यका लागि सामूहिक लगानी र प्रविधिको आवश्यकता अपरिहार्य रहेको बताउनुभयो। सो अवसरमा आइसिटी पत्रकार विकास मञ्चका उपाध्यक्ष कृष्णा राज तिमिल्सिनाले स्वागत मन्तव्य राख्दै कार्यक्रमको गरिमा बढाउनुहुने सबैप्रति आभार व्यक्त गर्नुभयो।
कार्यक्रममा तारकेश्वर नगरपालिका वडा नं. ३ का अध्यक्ष परशुराम अर्याल र छिमेकी टोखा नगरपालिका वडा नं. ९ का लोकप्रीय वडा अध्यक्ष रामभक्त घिमिरेले पनि आ-आफ्नो क्षेत्रबाट शैक्षिक रूपान्तरणमा ऐक्यबद्धता जनाउनुभयो। समाजमा शान्ति, सुरक्षा र अमनचयन कायम गर्न अहोरात्र खटिनुहुने बालाजु प्रहरी वृत्तका प्रमुख, प्रहरी नायब उपरीक्षक (डिएसपी) एमलाल बन्जाडे, तारकेश्वर होटल एसोसिएसनका अध्यक्ष राजु फुयाँल, तङ्कदाका सञ्चालक योगेन्द्र महतो, र स्थानीय समाजसेवी लगायतको गरिमामय उपस्थिति रहेको थियो। कार्यक्रमको कुशल सञ्चालन उद्घोषक पत्रकार सावित्रि बस्नेतले गर्नुभएको थियो।
उक्त ऐतिहासिक समारोहमा विभिन्न मिडिया हाउसमा आबद्ध सञ्चारकर्मी तथा पत्रकार साथीहरूको बाक्लो र उत्साहजनक उपस्थिति रहेको थियो। साथै, विद्यालयका शिक्षक-शिक्षिकाहरू, ठुलो सङ्ख्यामा उपस्थित अभिभावकहरू र विद्यार्थीहरुलाई आवश्यक सबै सामाग्री कक्षा पाएसँगै दंग परेका विद्यार्थी भाइबहिनीहरूको ऊर्जावान् सहभागिताले विद्यालयको प्राङ्गण भरिभराउ बनेको थियो। अतिथिहरूको स्वागतका लागि आयोजक टोली विमला दिक्षित ,सरिता राय लगायतले खादा तथा माला अर्पण गर्नुभएको थियो भने मञ्चको एक छेउमा आकर्षक ढंगले सजाइएको टेबलबाट सामग्रीहरू हस्तान्तरण गरी तस्बिर खिचाउने व्यवस्था मिलाइएको थियो।
सामग्री हस्तान्तरण पश्चात सभापति पुस्कर राज पाण्डे र मुख्य दाता गणेश रायले मुख्य अतिथि महानायक राजेश हमाल, मेयर कृष्ण हरि महर्जन, वडा अध्यक्षहरूलाई कृतज्ञता स्वरूप ‘मायाको चिनो’ (Token of Love) प्रदान गर्नुभयो।साथै कार्यक्रममा युवा चित्रकार राज महर्जनले प्रमुख अतिथि महानायक र मेयर कृष्ण हरि महर्जनको तस्विर आफैले कोरेर प्रदान समेत गरेका थिए ।
कार्यक्रमको अन्त्यमा सभापति एवं आइसिटी पत्रकार विकास मञ्चका अध्यक्ष पुस्कर राज पाण्डेले छोटो र ओजपूर्ण मन्तव्य राख्दै सबै सहयोगी हातहरू, पत्रकार, शिक्षक, अभिभावक र प्रमुख अतिथिप्रति हार्दिक धन्यवाद ज्ञापन गर्नुभयो। उहाँले भन्नुभयो, “हाम्रो सानो प्रयासले बालबालिकाको भविष्य उज्यालो बन्छ भने हामी निरन्तर खटिन तयार छौँ। यो प्रोजेक्टलाई यहाँसम्म ल्याउन सहयोग गर्ने सम्पूर्ण दाता र सञ्चारकर्मीहरूमा हार्दिक धन्यवाद व्यक्त गर्दै कार्यक्रम समापन भएको घोषणा गर्दछु।”
आजको आधुनिक युगमा प्रविधि केवल विलासिता नभएर शिक्षाको मेरुदण्ड बनिसकेको छ। नागार्जुनको ठूलागाउँ माध्यमिक विद्यालयमा सुरु भएको यो ‘नमुना कक्षा’ र ‘प्रोजेक्ट जिरो इन्भेष्टमेन्ट’ अभियानले सरकारी विद्यालयहरूमा पनि निजी सरह वा सोभन्दा उत्कृष्ट डिजिटल शिक्षा दिन सकिन्छ भन्ने बलियो उदाहरण प्रस्तुत गरेको छ। कला, राजनीति, समाजसेवा र सञ्चार जगत्को यो संयुक्त प्रयासले देशको शैक्षिक गुणस्तर सुधारमा एउटा कोसेढुङ्गा साबित हुने निष्कर्ष निकाल्न सकिन्छ।
